Jetisýlyqtar Qaraǵandyǵa gýmanıtarlyq kómek jiberdi
Taldyqorǵandaǵy «Iman» ortalyq meshitinen 5 tonnadan astam azyq-túlik tıelgen júk kóligi jolǵa shyqty, dep habarlaıdy QazAqparat tilshisi.
Taǵamdar men kıim-keshekti meshit qyzmetkerleri, zeket qorynyń ókilderi jınaǵan. Saýapty iske jetisýlyq jomart jandar da óz úlesterin qosty.
Jóneltilgen zattardyń ishinde, 100 qap un, 100 qap kespe, 105 lıtr suıyq maı, 93 dana kórpe -jastyq, 200 jup aıaq-kıim de bar. Bas ımam bul bastama el birligin arttyryp, halyqty sabyr men tózimdilikke shaqyrý maqsatynda uıymdastyrylǵanyn aıtty. Sondaı-aq qıyn jaǵdaıǵa tap bolǵan aǵaıyndarǵa kómek berý, musylmandyq paryzymyz deıdi.
Aıta ketý kerek, bıyl elimizdiń birneshe oblysynda kóktemgi sý tasqyny oryn alyp, qalyń jurtshylyqty ábigerge saldy. Qazaqstan musylmandary dinı basqarmasy bıylǵy kóktemde sý tasqynynan zardap shekken otbasylarǵa gýmanıtarlyq kómek jiberý maqsatynda «Qaıyrymdylyq kerýeni» aktsııasyn uıymdastyrǵan bolatyn. Igi bastamaǵa elimizdiń ár óńiri óz úlesterin qosyp, belsendilik tanytýda. 
