Jetisýlyqtar Eýropa lıgasynyń irikteý kezeńiniń alǵashqy oıynynda súrindi
ALMATY. 6 shilde. QazAqparat - Taldyqorǵanyń «Jetisý» fýtbol komandasy Eýropa lıgasynyń irikteý kezeńinde óziniń basty artyqshylyǵyn paıdalana almady.
Polshanyń Poznan qalasynda «Leh» komandasymen bolǵan alǵashqy oıynda 0:2 esebimen jeńilis tapty.
Taldyqorǵandyqtardyń bas bapkeri Sloban Krchmarevıch: «Leh» týraly bar biletinim - olar óte myqty komanda. 2010 jyly el chempıony atanǵan. Búginde óz elinde úzdik úshtikke kiredi. Olarda qazir úzilis. Al bizde fýtboldyń qyzyp turǵan shaǵy. Bul bizdiń basty artyqshylyǵymyz.
Bizde problema jeterlik. Maýsymaralyq úzilis kezinde jastar quramasymen boldym da, klýbtaǵy jattyǵý jumystarynyń barysyn kómekshim júrgizdi. Bul daıyndyǵymyzdy kishkene kesheýildetip tur. Progresimiz óte baıaý. Degenmen, ár oıyn saıyn kúsheıip kele jatqan sııaqtymyz. Taǵy bir kemshiligimiz - gol soǵý problemasy. Eger óz múmkindikterimizdi tolyq júzege asyra alsaq, onda ár oıynda birneshe goldan soǵar edik. Alaıda, chempıonatta bolsyn, eýrododada bolsyn, ózimizdi áli kórsetemiz», - degen edi. Degenmen 12 shildede óz alańyndaǵy qarymta kezdesýde «jetisýlyqtardyń» ese qaıtarýǵa áli múmkindigi bar. Bul úshin eń kem degende qarsylasyn 3 dop aıyrmasymen utýy kerek. Eger jeńiske jetse, kelesi kezeńde 19, 26 shilde kúnderi Ázirbaıjannyń Lenkoran qalasynyń «Hazar» men Estonııanyń Tallın qalasynyń «Nomme Kalıý» komandalary arasyndaǵy oıyndardyń jeńimpazymen kezdesedi.
