Jetisýlyqtar Bazarbek Tezekbaevty aqtyq saparǵa shyǵaryp saldy
TALDYQORǴAN. QazAqparat - Búgin jetisýlyqtar QR Mádenıet qaıratkeri Bazarbek Tezekbaevpen qoshtasty. Marqumdy aqtyq saparǵa shyǵaryp salý rásimi ózi qyzmet etken Bıken Rımova atyndaǵy teatrda ótti.
Bazarbek Tezekbaevpen qoshtasýǵa óńir basshylary, zııaly qaýim ókilderi men et jaqyndary keldi. Jınalǵandar marqumnyń otbasy men týǵan-týys, jaqyn-jýyqtaryna qaıǵyryp kóńil aıtty. Mezgilsiz qaza bolǵan óner ıesiniń artynda jary jəne eki ul, eki qyzy qaldy.
Bazarbek Tezekbaev 1952 jyly 6 sáýirde Almaty oblysy, Kerbulaq aýdany, Qoıankóz aýylynda dúnıege kelgen. Qoıankóz, Jolaman aýyldarynyń mádenıet úılerin basqarǵan óner ıesi 1990-1999 jyldar aralyǵynda Kerbulaq aýdandyq mádenıet bóliminiń meńgerýshisi qyzmetin atqardy. 2000-2003 jyldary osy bólimde bas maman bolyp eńbek etti. Al 2003-2010 jyldary B. Rımova atyndaǵy drama teatrynyń ákimshilik dırektory, 2010-2015 jyldary dırektory qyzmetterin atqarǵan.
Óner salasynyń damýyna ólsheýsiz úles qosqan Bazarbek Tezekbaev Qazaqstan Respýblıkasynyń Mádenıet qaıratkeri, Kerbulaq aýdanynyń «Qurmetti azamaty», «Úzdik eńbegi úshin» jáne «Táýelsizdiktiń 20 jyldyǵy» medaldarynyń ıegeri atanǵan.
