Jetisýlyqtar barsha qazaqstandyqtardy «Dástúrli aǵash egý merekesine» shaqyrdy
ALMATY. 7 qańtar. QazAqparat /Erbol Turymbetov/ - Keshe Almatydaǵy «Tilektas» meıramhanasynda «El táýelsizdiginiń 20 jyldyq merekesine - ár aýyldyq okrýgte 20 myń aǵash» degen taqyrypta barsha Qazaqstan halqyn «Dástúrli aǵash egý merekesine» shaqyrý jóninde dóńgelek ústel bolyp ótti.
Aıtýly sharany respýblıkalyq ǵylymı-tanymdyq, kópshilik «Gúlstan» jýrnaly men Almaty oblysy «Jetisý jastary» jastar ortalyǵy jáne «Gúlzár» qoǵamdyq birlestigi birlese uıymdastyryp otyr. «Gúlstan» jýrnalynyń bas redaktory Gózel Quljabaevanyń aıtýy boıynsha, jobanyń júzege asýy elimizdiń árbir azamatynyń patrıottyq sezimine baılanysty bolmaq. «Bıylǵy jyldy BUU orman-toǵaı jyly dep jarııalady. Elimizdiń ekologııalyq jaǵdaıyn jaqsartýǵa baǵyttalǵan bul jobany júzege asyrýǵa tolyqtaı múmkindik bar. Ótken jyldyń qorytyndysy boıynsha, Almaty oblysy, Kerbulaq aýdanynyń Báısheshek okrýginde 20 myń túp aǵash egilgen. Biz osy ıgi bastamany ári qaraı damytqaly otyrmyz», dedi G. Quljabaeva.
Aıta keteıik, 2010 jyldyń 28 jeltoqsanynda Taldyqorǵan qalasynda Almaty oblysy ákimi Serik Úmbetovtyń qoldaýymen jastardyń qatysýymen Úndeýdi jarııalaý jıyny ótken bolatyn.
Keshe jarııalanǵan Úndeýde «...Barsha adamzat urpaǵynyń deni taza, sulý da symbatty bolyp ósýiniń kepili osy tabıǵat sulýlyǵy.
Biz, Almaty oblysynyń jastary, respýblıkalyq ǵylymı-tanymdyq, kópshilik «Gúlstan» jýrnaly men «Gúlzár» qoǵamdyq birlestigi barsha Qazaqstan halqyn «Dástúrli aǵash egý merekesine» shaqyryp, Úndeý jarııalaımyz», delingen.
