Jetisýlyq jastar latyn álipbıine kóshýdi qoldaıdy

TALDYQORǴAN. QazAqparat - Jetisýlyq jastar memlekettiń latyn álipbıine kóshýin biraýyzdan qoldaıdy. Elbasynyń ıgi bastamasyn zaman qajettiligi dep qabyldaǵan olar Taldyqorǵanda arnaıy fleshmob uıymdastyrdy, dep habarlaıdy QazAqparat tilshisi.

Qolshatyr ustaǵan jastar «Qoldaımyz» degen jazý jazyp, sap túzedi. Biz elimizdi rýhanı jańǵyrýǵa bastaıtyn óskeleń urpaq retinde látin áripterin eń birinshi kezekte meńgerýimiz qajet dep úndeý tastady.

«Bizdiń veterınarııa salasynda kóbinese dári-dármekter aýrýlardyń kóbisi latyn árpinde, latyn tilinde kezdesedi. Sondyqtan da men úshin jáne basqa da veterınarııa bóliminde oqıtyn balalar úshin latyn álipbıi óte qolaıly jáne ońaı», - deıdi stýdent Islam Ermekuly.

Latyn álipbıin qoldaý aktsııasyna belsene qatysqan Taldyqorǵan agrotehnıkalyq kolledj stýdentterine jańa álipbıdi meńgerý óte ońaı bolady. Sebebi maldárigerlik mamandyqty tańdaǵan tálimgerler birinshi kýrstan latyn tilin úırenedi.