Jetisýlyq jas daryndy oqýshylar oblys ákimine ǵylymı jumystaryn tanystyrdy
ASTANA. QazAqparat - Búgin oblys ákimi Amandyq Batalov óńirdegi daryndy balalarmen júzdesti. Kezdesýge respýblıkalyq, halyqaralyq pán olımpıadalarynyń júldegerleri, ǵylymı joba jarystarynyń jeńimpazdary - jalpy sany 73 oqýshy jáne olardyń ustazdary qatysty, dep habarlady zhetysu.gov.kz.
Oblys basshysy óz sózinde jas býynnyń alańsyz oqyp, sapaly bilim alýyna, ózderin jetildirýge memleket tarapynan barlyq qoldaý sharalary jasalyp otyrǵanyn aıtyp, ozattardy jetken jetistikterimen quttyqtady. Sondaı-aq, aımaq basshysy kezdesýde oqýshylarǵa gramotalar men syılyqtar tapsyrdy.
Muhtar Aryn atyndaǵy №24 «Ekonomıka jáne bıznes» arnaýly lıtseıiniń» 11-synyp oqýshysy, Oral qalasynda ótken jaratylystaný-matematıkalyq baǵyt boıynsha respýblıkalyq olımpıadanyń qola júldegeri Sanjar Burumbaı sóz sóılep, «Balalyq shaqtyń armany» atty beınefılminiń tusaýkeserin usyndy. Sonymen qatar, Ońtústik Koreıanyń Tedjon qalasynda a ótken І Halyqaralyq «Jas ǵalym» ǵylymı joba baıqaýynyń jeńimpazdary Zańǵar Musaǵalıev pen Arýjan Qalıeva aýyl sharýashylyǵyna qatysty, atap aıtqanda kartopty shirip ketýden saqtaıtyn ǵylymı jobalarymen tanystyrdy. Sol sııaqty Temirtaý qalasynda bolǵan VII Prezıdenttik olımpıadanyń kúmis júldegeri Móldir Bolatbekova sóz sóılep, Sochı qalasynda ótken Halyqaralyq robototehnıka olımpıadasynyń 3 oryn júldegerleri, Nazarbaev zııatkerlik mektebiniń oqýshylary Bek Talǵat pen Ratmır Satpaev óz jobalaryn kópshilik nazaryna usyndy. Jalpy, ótken jyly oqýshylarymyz halyqaralyq jarystarda 155 medalǵa ıe bolsa, bıylǵy jyly 167 medaldi jeńip aldy. Sonyń nátıjesinde respýblıka boıynsha ekinshi orynnan kórinip, «Úzdik komanda» ataǵyna ıe boldy. Esterińizge salsaq, buǵan deıin oblys ákimi Amandyq Batalov elimizdiń aldyńǵy qatarly joǵary oqý oryndarynyń rektorlarymen kezdesip,turmysy tómen otbasynan shyqqan 91 túlekke grant bólý týraly memorandýmǵa qol qoıǵan. Oǵan qosa Almatydaǵy «Heılıberrı» mektebine 10 oqýshyny kásipkerlerdiń demeýshiligimen oqytý týraly da kelisimge qol jetkizilgen bolatyn.
