«Jetisýlyq» voleıbolshylardyń áıelder arasynda klýbtyq Azııa chempıonatyndaǵy qarsylastary anyqtaldy
ALMATY. 19 sáýir. QazAqparat - Taılandtyń Nakhonratchasıma qalasynda 21-29 sáýir kúnderi voleıboldan áıelder arasynda 13-klýbtyq Azııa chempıonaty ótedi.
Onda el namysyn Almaty oblysynyń «Jetisý» komandasy qorǵaıdy. Onda Qazaqstan chempıondary irikteý synynda «V» tobynda 21 sáýirde- Qytaı, 24-inde- Malaızııa, 25-inde - Shrı-Lanka chempıonatynyń jeńimpazdarymen kezdesedi. «A» tobynda Taıland, Vetnam, Mıanma, Iran jáne Japonııa voleıbolshylary óner kórsetpek. Chempıonattyń shırek, jarıtylaı jáne aqtyq syndary 27-29 kúnderi ótedi.
Bas bapker Asqar Shalqybekov bul dúbirli dodada Tatıana Pıýrova (1982), Olga Nasedkına (1982), Lıýdmıla Anarbaeva (1983), Korınna Ishımtseva (1984) , Marına Storojenko (1985), Olga Soboleva (1985), Olga Drobyshevskaıa (1985), Olga Grýshko (1976), Olga Karpova (1980), Alena Sych (1988), Tatıana Afanaseva (1990) men Irına Lýkomskaıaǵa (1991) senim artpaq. Jetisýlyqtar bul joly óz quramyn astanalyq O.Grýshko, O. Karpova jáne almatylyq T. Afanaseva, I. Lýkomskaıa men A.Sych sııaqty jańa oıynshylarmen kúsheıtýde.
1999 jyldan beri dástúrli túrde jyl saıyn ótip kele jatqan Azııa chempıonatynda qazaqstandyq voleıbolshylar arasynan 2007 jyly Almaty qalasynyń «Rahat» komandasy chempıon atanǵan. Al byltyrǵy básekede «Jetisýlyqtar» qola júldemen oraldy. Bıyl el birinshiliginde qarsylas shaq keltirmegen olar bul joly Azııada top jarýdy aldyna maqsat etip qoıyp otyr.
