Jetisýlyq voleıbolshy qyzdar Ulttyq lıgadaǵy HH Qazaqstan chempıonatyn sátti bastady
MATY. 23 qarasha. QazAqparat /Erlik Erjanuly/ - Óskemende voleıboldan Ulttyq lıgadaǵy áıelder komandalary arasynda HH Qazaqstan chempıonatynyń 1-týrynda alǵashqy 2 kúnniń qorytyndysy boıynsha eń joǵary upaı jınaǵan astanalyqtar men qaraǵandylyqtar kósh bastady.
Astana qalasynyń sportshylary temirtaýlyq («Metallýrg AMT») jáne almatylyq qurbylaryn 3:0 esebimen jeńdi. Qaraǵandy oblysynyń «Qaraǵandy» komandasy bolsa keshe óskemendikterdi («Shyǵys-QorǵasynQurylys»), arǵy kúni temirtaýlyqtardy dál osyndaı eseppen tize búktirgen edi. Al 2010/2011 jyldardaǵy maýsymda el chempıonatynyń kúmis júldegeri atanǵan Pavlodar oblysynyń «Ertis-Qazhromy» alǵashqy oıynynda óskemendikterden 3 upaı oljalaǵanmen, keshe el chempıony sanalatyn Almaty oblysynyń «Jetisýyna» 1:3 esebimen ese jiberdi. Búgin endi «Almaty» men «Metallýrg AMT», «Qaraǵandy» men «Jetisý», «Astana» men «Shyǵys-QorǵasynQurylys» sheberlik baıqasady. Al jupsyz qalǵan pavlodarlyqtar endi bıylǵy chempıonatta 3-4 orynǵa ıe bolǵan «Astana» men «Qaraǵandy» komandalarmen bolatyn kelesi oıyndarǵa daıyndyǵyn taǵy pysyqtaı túspek. Óıtkeni olar endigi 4 kezdesýde qarsylastaryna óz basymdyǵyn moıyndata alsa, týrnır kestesinde 2-orynǵa kóterilýge áli de múmkindigi bar.
