Jetisýlyq voleıbolshy qyzdar el chempıonatynyń 3-týrynda da jeńilissiz kele jatqan jalǵyz komanda bolyp otyr
ALMATY. 20 qańtar. QazAqparat /Erlik Erjanuly/ - Voleıboldan Astanada Ulttyq lıgadaǵy áıelder komandalary arasynda ótip jatqan HH Qazaqstan chempıonatynyń 3-týrynda da jetisýlyqtar ár oıynda eń joǵary upaıǵa ıe bolýda.
Almaty oblysynyń voleıbolshylary keshe almatylyqtar («Almaty») men óskemendikterdi («Shyǵys-QorǵasynQurylys») 3:1, al temirtaýlyqtardan («Metallýrg AMT») 3:2 esebimen basym túsken Qaraǵandy oblysyndaǵy («Qaraǵandy») qarsylastaryn 3:0 esebimen utty. Sonyń nátıjesinde olar qazir el chempıonatynda jeńilissiz kele jatqan jalǵyz komanda bolyp otyr. Qazirgi tańda «Jetisýda» - 45, «Astanada» - 34, «Ertis-Qazhromda» - 29, «Qaraǵandyda» - 22, «Almatyda» - 16, «Metallýrg AMT» - 10, «Shyǵys-QorǵasynQurylysta» 6 upaı bar. Úshinshi týrda tek «Jetisýǵa» ese jibergen astanalyqtar ózge 3 kezdesýde 9 upaı jınap, týrnır kestesinde ekinshi orynǵa kóterildi. Olarǵa óz ornyn bosatqan pavlodarlyqtar bul joly 3 kezdesýden keıin qorjyndaryna 3 upaı ǵana qosty. Al qaraǵandylyqtar -8, almatylyqtar - 6, temitaýlyqtar 1 upaı jınasa, óskemendikter barlyq kezdesýde jeńilis tapty. Bul synda búgin olar endi temirtaýlyqtarmen upaı bólisýge bar kúshin jumsamaq. Óıtkeni 22 qańtardaǵy aqtyq kezdesýde jetisýlyqtardan upaı alý «Shyǵys-QorǵasynQurylys» úshin óte qıyn bolmaq.
