Jetisýlyq túlekter aýyldastaryna tamasha tartý jasady

  TALDYQORǴAN.QazAqparat - Búgin Alakól aýdanyndaǵy Kóktuma orta mektebiniń túlekteri "Týǵan jer" baǵdarlamasyna úles qosty. 20 jyldyq kezdesýge jınalǵan olar, jerlesterine erekshe tartý jasady. Aýyldastaryna zamanaýı sahna syılady. Alakól kóliniń jaǵalaýyn mekendegen kóktumalyqtar úshin bul tamasha syı boldy. Ashyq aspan astyndaǵy jańa sahnada alǵash bop ataqty aıtysker aqyndar óner kórsetti, dep habarlaıdy QazAqparat tilshisi.

Aınur Tursynbaeva, Sara Toqtamysova,  Aıtaqyn jáne Jandarbek Bulǵaqovtar, Balǵynbek Imashev, Serikzat Dúısenǵazın  syndy azýly alty aqyn jyr jarystyryp, toıdy toıǵa jalǵady.

11 jyl birge oqyǵan synyptastarymen 20 jyldyq kezdesýge Almaty oblysy  ákimniń  orynbasary  da keldi. Jaqsylyq Omar bilim shańyraǵynyń 1997- jylǵy túlegi. Áserli basqosýda aımaq basshysynyń sálemin jetkizip, ádemi tilek aıtyp, oqýshy kezderin eske alysty. 

"Jelkildep ósip kele jatqanda 7-8 synypta toqyraý zamanǵa tap boldyq. Kıetin kıim, ishetin asqa zar bolǵan ýaqyttar bolǵan. Mektepte jylý joq, kitap jetispedi. Al úılerde jaryq joq. Barlyǵy qırap turdy. Mekteptiń tóbesinen jańbyr tambasyn dep jigitter jazǵy demalysymyzdy tóbe jamaý jumysyna arnaǵan kezder boldy", degen Jaqsylyq Omar búgingi jas tolqynǵa barlyq jaǵdaı jasalyp otyrǵanyn jetkizdi.  Tek  "oqyńdar" dep aǵalyq aqylyn aıtty. Mekteptiń materıaldyq-tehnıkalyq bazasyn nyǵaıtý maqsatynda  bilim ordasyna oblys ákimdigi "gazel" avtokóligin syıǵa tartty.

"Bizdiń Kóktuma aýyly aýdan ortalyǵynan 70 shaqyrym alysta ornalasqan. Buryn oqýshylardy jarystarǵa taksı jaldap jetkizip júrdik. Endi myna avtokólikpen Úsharal, Taldyqorǵan, Almatydaǵy bilim , sporttyq básekelerge alańsyz jete alamyz. Bul syılyqqa ujym bolyp erekshe qýanyp turmyz", - dedi mektep dırektory Almagúl Qasymhanova. 

Kóktuma qazaq orta mektebi 80 jyldyq tarıhy bar qara shańyraq. Myńdaǵan shákirtti samǵatyp ushyrǵan bilim ordasy. Al bıyl 15 oqýshy mektep  bitirdi.