Jetisýlyq sýdıalar kóp balaly otbasylarǵa qaıyrymdylyq jasady

TALDYQORǴAN. QazAqparat - Almaty oblysynyń sýdıalary Alǵys aıtý kúninde kóp balaly jáne az qamtylǵan otbasylarǵa arnaıy baryp, kóktemniń alǵashqy merekesimen quttyqtap, qamqorlyqtaryn kórsetýde, dep habarlaıdy QazAqparat tilshisi.

Sot qyzmetkerleriniń  qaıyrymdylyǵyna bólengenderdiń biri   9 balany tárbıelep otyrǵan jalǵyz basty ana. Taldyqorǵan qalasyna qarasty Shaıqorǵan eldi mekeninde jaldamaly úıde kún keshken januıa  qajetti  azyq-túlikpen qamtyldy.

«Alǵysym sheksiz. 4 kelilik kespeniń bes túrin, bir qap un, 5 kelilik shemishkeniń maıy, sháı, kúrish, qaraqumyq, balalaryma táttiler, bárin alyp kelipti.Meniń búgin kenjem 4 jasqa tolyp jatyr. Ony da quttyqtap, qýanyshymyzdy eseledi. Sot qyzmetkerlerine alǵystan basqa aıtarym joq», -dep  9 balanyń anasy aǵynan jaryldy.

Oblystyq sottyń baspasóz qyzmetiniń aıtýynsha, mundaı qaıyrymdylyq tek Taldyqorǵanda ǵana emes, búkil Almaty oblysy boıynsha júrgizilip jatyr eken.