Jetisýlyq sýdıalar atqa minip, aýyldardy aralady

TALDYQORǴAN. QazAqparat - Almaty oblysynyń sýdıalary Elbasynyń «Uly dalanyń jeti qyry» atty maqalasyn qoldap, jylqy minip seıil qurdy. Olar baǵzy zamannyń bı-sheshenderi ispetti aýyl aralap, daý-damaıdy sheshýge barǵan kórinis kórsetti, dep habarlaıdy QazAqparat tilshisi.

Nursultan Nazarbaevtyń «Uly dalanyń jeti qyry» atty maqalasynan shabyt alǵan sýdıalar óńirde alǵashqy bolyp erekshe qoldaý kórsetti. Olar Prezıdenttiń jylqyny qolǵa úıretý men atqa miný mádenıeti týraly oılaryn qalyń jurtqa jáne ózge de áriptesterine tereń nasıhattaýǵa kiristi. Almaty oblystyq sotynyń tóraǵasy Meırambek Taımerdenov bastaǵan bir top sýdıa tulpar tizgindep, qazaqtyń ıgi dástúrlerin jańǵyrtty. Qazaq dalasynda tórelik etken bı-sheshenderdiń izin jalǵaýshy retinde kórinis kórsetti.

Bul bastama estafeta retinde uıymdastyryldy. Sondyqtan Jetisýdyń jeti ózeniniń jaǵasynda ornalasqan aýdandardyń sýdıalary qoldaryna búrkit alyp, jandaryna tazy eritip, jylqyǵa baılanysty ádet-ǵuryp, dástúrlerdi eki apta boıy el jurtqa áńgimeledi.  
 

Oblystyq sot tóraǵasy Meırambek Taımerdenovtyń aıtýynsha, jylqy qazaq úshin qasıetti janýar. «Jylqy maly ár ýaqytta taza jerden shóp jeıdi, taza jerden sý ishedi. Bul janýar alǵash qazaq dalasynda qolǵa úıretilgenin ǵalymdar dáleldedi. Qazaq batyrlary atqa qonyp, ulan baıtaq jerimizdi saqtap qaldy. Qazaqtyń bı-sheshenderi jylqy minip, aýyl aralap, el ishindegi daýlardy sheship, halyqty bitimgershilikke shaqyrǵan. Sondyqtan biz osy tórt túliktiń ishindegi Qambar ata tólin erekshe qurmetteýimiz kerek», - dep atap ótti ol.
 

Bul ıgi bastamany Almaty oblysynyń sýdıalary ońtústiktegi áriptesterine joldady.