Jetisýlyq polıtseıler mereke qarsańynda ant qabyldady
Sondaı-aq, jıynda qyzmetke jańadan kelgen jas polıtseıler adal qyzmet etýge saltanatty túrde ant etti. Іs-sharaǵa qonaq retinde shaqyrylǵan ishki ister organdarynyń ardagerleri jas polıtseılerge qyzmetine adal bolý úshin izgi nıetterin bildirip, batalaryn berdi.
Sonymen qatar, osy merekege baılanysty birqatar is-sharalar uıymdastyryldy.
Polıtsııa departamentiniń jeke quramy «Nur Otan» partııasy Almaty oblystyq fılıaly tóraǵasynyń Birinshi orynbasary Ǵalıasqar Sarybaevpen kezdesti. Partııa ókili Elbasymyzdyń ómiri men onyń tulǵa bolyp qalyptasýy, saraly saıasaty týraly baıandama jasady. Kezdesýde Tuńǵysh Prezıdenttiń ómir joly týraly fılm kórsetildi.
Mereke qarsańynda tártip saqshylary balalarǵa arnap «Ashyq esik kúnin» ótkizdi. Mektep oqýshylary polıtseılerdiń qyzmetiniń qyr-syrymen tanysyp, olardyń kólik túrlerin, qyzmettik ıtterin kórdi. Departamenttegi murajaıdy aralaǵan oqýshylar tańdanysyn jasyrmady. Keıbiri bolashaqta polıtseı bolyp, elge qyzmet etýdi armandaıtynyn aıtty.
Taldyqorǵan qalasyndaǵy «Dınamo» sport kesheninde Polıtsııa departamentiniń bastamasy men Almaty oblysyndaǵy kúshtik qurylymdar arasynda voleıboldan jarys uıymdastyryldy. Dop dodasyna Tótenshe jaǵdaılar departmentiniń, Qylmystyq-atqarý júıesi departamentiniń, Arnaıy kúzet qyzmeti basqarmasynyń, Almaty oblysy UQKD, oblystyq Sybaılas jemqorlyqqa qarsy kúres basqarmasy jáne Polıtsııa departamentiniń komandalary qatysty.
Tartysty ótken jarysta Almaty oblysy Polıtsııa departamentiniń komandasy 1-oryndy, Ulttyq qaýipsizdik komıteti Almaty oblystyq departamentiniń komandasy 2-oryndy ıelense, Almaty oblysy Arnaıy kúzet qyzmeti basqarmasynyń voleıbolshylary úshtikti túıindedi.
Óz kezeginde, Almaty oblysy Polıtsııa departamentiniń basshylyǵy barlyq qazaqstandyqtardy merekemen quttyqtap, otbasylaryna amandyq, elimizge tynyshtyq tiledi.
