Jetisýlyq ónerpazdar Astanaǵa attandy
TALDYQORǴAN.QazAqparat - Shildeniń 11-15-i aralyǵynda Astana qalasynda «Ekspo-2017» halyqaralyq mamandandyrylǵan kórmesi aıasynda Almaty oblysynyń Mádenıet kúnderi ótedi. Osyǵan oraı Taldyqorǵan qalasyndaǵy Qaratal ózeni jaǵalaýynda oblys ónerpazdaryn kópshilik atalmysh sharaǵa saltanatpen shyǵaryp saldy, dep habarlaıdy QazAqparat tilshisi.
Saltanatty sharaǵa oblys ákimi Amandyq Batalov qatysyp, óńirde mádenıet salasyn damytýǵa aıryqsha kóńil bólinip otyrǵanyn jetkizdi. Máselen, óner ujymdary úshin sońǵy úlgidegi jańa apparatýralar satyp alynǵan.
«Elordamyz óziniń 19 jyldyǵyn «Ekspo-2017» halyqaralyq mamandandyrylǵan kórmesin ótkizý mártebesimen qarsy alyp otyr. Búginge deıin kórmeni elimizdiń jáne shetelderdiń ár qıyrynan jarty mıllıonǵa jýyq adam tamashalap úlgerdi. Búgin biz «Ekspo-2017» halyqaralyq mamandandyrylǵan kórmesine oraı Astana qalasynda 11-15 shilde aralyǵynda ótetin Almaty oblysynyń Mádenıet kúnderine oblys ónerpazdaryn shyǵaryp salǵaly turmyz. Almaty oblysynyń Mádenıet kúnderin tamashalaǵan árbir adam erekshe áser alyp, óńirdiń jańalyǵy men tyń tynysyn tanyp qaıtady degen senimdemin. Jetisýdyń mádenıeti men ónerin barynsha jarqyrata tanytýlaryńyzǵa tilektespin», - dedi A.Batalov.
Saltanatty shyǵaryp salý rásimi Súıinbaı atyndaǵy oblystyq fılarmonııa men «Qulansaz» FEA-nyń kontsertimen jalǵasty.
Jalpy, Almaty oblysynyń Mádenıet kúnderine Bıken Rımova atyndaǵy oblystyq drama teatry, Súıinbaı atyndaǵy oblystyq fılarmonııa, «Qulansaz» folklorlyq-etnografııalyq ansambli, «Altynaı» halyqtyq bı memlekettik ansambli, M. Tynyshpaev atyndaǵy oblystyq tarıhı-ólketaný mýzeıi, kórkemsýret galereıasy, qolónershiler men sportshylar atsalysatyn bolady. Sharanyń saltanatty ashylý rásimi 11 shildede saǵat 19:00 de Qazaqstan ortalyq kontserttik zalynda shymyldyǵyn túredi.
