Jetisýlyq metsenat aýyldastaryna erekshe tartý jasady
«Elbasy óziniń baǵdarlamalyq maqalasynda «Patrıotızm eń aldymen týǵan jerge, óz aýylyna, qalasyna, óńirine jáne kishi otanyna degen súıispenshilikten bastaý alady» degen bolatyn. Aıtylǵan sózge qulaq salǵan jetisýlyq kásipkerlerdiń úlken qulshynyspen jáne ultjandylyǵymen «Týǵan jer» baǵdarlamasyn iske asyrýǵa jumyla kirisip ketkendigi bizdi qatty qýantady. Búgingi kúni Jetisý ólkesiniń áleýmettik ınfraqurylymyn damytýǵa ólsheýsiz úlesin qosyp kele jatqan Almaty oblysynda týyp ósken esimi elge taraǵan ataqty metsenattardyń bary belgili. Osy tusta «Týǵan jer» baǵdarlamasy aıasynda eń alǵashqy joba dál osy Eńbekshiqazaq aýdanynda júzege asyrylyp jatqandyǵyn erekshe atap ótken jón. Bul barshamyz úshin jaqsy úlgi bolmaq. Meniń oıymsha, osyndaı ıgi ister oblysymyzdyń ózge azamattarynyń da qoldaýyn tabatyn bolady. Barshańyzdy taǵy bir márte osynaý ásem demalys saıabaǵynyń ashylýymen shyn júregimnen quttyqtap, árbir isterińizge sáttilik tileımin», - dedi A. Batalov.
Esterińizge salar bolsaq, jańa demalys saıabaǵy Sabırovtar otbasynyń arqasynda ashylyp otyr. Olar joǵary tehnologııamen jemister men kókónisterdi ósirýmen aınalysatyn «Amal BIO» JShS-niń menshik ıesi bolyp tabylady. 1 ga aýmaqty quraıtyn saıabaqta shaǵyn fýtbol alańy, balalarǵa arnalǵan oıyn alańdary, strıtbol oıynyna arnalǵan alań, 130 orynǵa arnalǵan kontsert ótetin oryn ornalasqan. Saıabaqtyń barlyq aýmaǵy abattandyrylǵan, jaryqtandyrylǵan, 100 astam jas kóshetter men dekoratıvti gúlzarlar otyrǵyzylǵan. Atalǵan jobany iske asyrýǵa metsenattardyń óz qarajaty esebinen 30 mln teńge qarajat bólingen.
Sabırovtardyń aıtýynsha olar búgingi ispen toqtap qalmaq oılary joq. Aldaǵy ýaqytta da «Týǵan jer» baǵdarlamasyn júzege asyrýǵa bilek sybana kirisetin bolady. Olardyń josparynda Jańa turmys jáne Qazaqstan aýyldarynda da dál osynda demalys saıabaqtaryn ashý maqsaty tur.
