Jetisýlyq kásipkerler turmysy tómen jáne kópbalaly 6 otbasyna baspana syılady

TALDYQORǴAN. QazAqparat - Almaty oblysynyń Alakól aýdanynda «1-mamyr - Qazaqstan halqynyń birligi» merekesi qarsańynda kásipkerlerdiń bastamasymen 6 turmysy tómen jáne kópbalaly otbasylarǵa turǵyn úı kiltteri tabystaldy, dep habarlaıdy QazAqparat tilshisi.

Búginde qoǵamda qaıyrymdy is jasap, qol ushyn sozar jomart azamattar sany kóbeıip keledi. Solardyń biri Ekpindi aýyldyq okrýginde ornalasqan «Maıqynov E» sharýa qojalyǵynyń basshysy Ermek Maıqynov «Kúmis alqa» ıegeri, kópbalaly ana Qaraqat Sartbaevaǵa 7 bólmeli úıdi syıǵa tartty.

«Aýdanymyzda kópbalaly analar sany az emes. Solardyń biri alty balanyń anasyna úıdiń kiltin tabystap otyrmyn. Aýdanymyzda bastalǵan mundaı qaıyrymdylyq ister ári qaraı jalǵasyn taýyp, qazaqtyń árbir batyr anasynyń kóńili toq bolsyn», - deıdi jeke kásipker.

Dál osyndaı qýanyshqa Qabanbaı aýylynyń turǵyndary, áleýmettik jaǵdaıy tómen Starchenko Zoıa Sergeevna men kópbalaly ana, «Kúmis alqa» ıegeri Svetlana Aqsholaqova keneldi. Bul qýanyshtyń dánekeri bolyp otyrǵan azamattardyń biri - oblystyq maslıhat depýtaty, «Qabanbaı jolaýshy» JShS-niń basshysy Qanat Qojabekov bolsa, ekinshisi - Alakól aýdanynyń ımamdary men aýdan jamaǵaty.

Sonymen birge, «Dostyq tazartý» JShS-niń dırektory Shalqar Jaqsybaev Qyzylaşy aýylynyń turǵyndary ІІ jáne ІІІ toptaǵy múmkindigi shekteýli Erlan Esimbekov pen Samal Orazbekovaǵa osy aýyldan jaıly 4 bólmeli baspana alyp berdi.

Qýanyshynda shek bolmaǵan analar óz taraptarynan osyndaı meıirimdi jandarǵa sheksiz alǵystaryn jetkizip, janarlaryna jas aldy.

Jalpy Alakól aýdanynda 1384 kópbalaly jáne áleýmettik jaǵdaıy tómen otbasy tirkelgen. Búgingi tańda onyń 165 úı kezeginde.