Jetisýlyq boıjetken Úshkól kólin saqtap qalýdy qolǵa aldy
TALDYQORǴAN. QazAqparat - Almaty oblysynyń turǵyny Nazym Musabekova sý sharýashylyǵymen aınalysyp, Úshkól kólin saqtap qalýǵa bel býyp otyr dep habarlaıdy QazAqparat tilshisi.
Boıjetkenniń maqsatyn júzege asyrýǵa «Startup «Bolashak» baıqaýynyń granty múmkindik beredi. Sebebi ol osy baıqaýdyń jeńimpazy atanyp, júldeli birinshi orynǵa ıe boldy. Eki jyl qatyrynan uıymdastyrylyp jatqan tyń ıdeıalar baıqaýyna Nazym Aqsý aýdanyndaǵy qurǵap bara jatqan Úshkólge jan bitirý jobasyn usynǵan bolatyn. Úshkóldi saqtap qalýdyń áleýmettik jáne ekologııalyq mańyzy zor. Kóp jyldan beri qaraýsyz jáne kútýsiz qalǵan kólge jaqyn arada qurǵap ketý qaýpi tónip tur. Sondyqtan Nazym Musabekova kólde balyq ósirip, tabys taýyp qana qoımaı, onyń ekinshi tynysyn ashyp, qorshaǵan ortaǵa paıdasyn da tıgizbek.
Jobanyń tıimdiligin baǵalaý úshin «Balyq sharýashylyǵy Qazaq ǵylymı-zertteý ınstıtýty» JShS mamandary shaqyrtylyp, zertteý júrgizildi. Nátıjesinde kól sýy balyq óndirýge jaramdy ekeni rastaldy. Qazirgi tańda jas kásipkerdiń utyp alǵan 12 mln teńge qarjynyń 9 mln teńgesi maqsatty ıgerilýde. Ózen arnasy tazartylyp, kól sýǵa toltyryldy. Balyq shabaqtarynyń alǵashqy legi jiberildi.
Aldaǵy ýaqytta balyqshylarǵa arnalǵan úı men balyq óńdeý tsehyn turǵyzýdy josparlap otyr. Jalpy baıqaý týraly Nazym «Damý» qorynyń KQKO mamandarynan estigen. Qatysýǵa nıet bildirip, mamandar tarapynnan tolyq keńes aldy. Respýblıka boıynsha 2 752 qatysýshynyń ishinde top jardy. Joba oıdaǵydaı júzege assa jańa jumys oryndary ashylyp, óńirde taǵy bir týrıstik ári óndiristik nysan paıda bolmaq.
