Jetisýlyq barlaýshylar «Beıbit mıssııa-2018» oqý-jattyǵýyna daıyndalyp jatyr
TALDYQORǴAN. QazAqparat - Almaty oblysynyń «Jetisý» áskerı polıgonynda 48/386 áskerı bóliminiń sarbazdary Shanhaı yntymaqtastyq uıymyna múshe elderdiń «Beıbit mıssııa-2018» oqý-jattyǵýyna qyzý daıyndalyp jatyr. 8 memlekettiń áskerıleri qatysatyn aýqymdy is-shara Reseıde ótedi, dep habarlaıdy QazAqparat tilshisi.
«Beıbit mıssııa-2018» antıterrorıstik komandalyq-shtabtyq jattyǵýyna Qazaqstan Respýblıkasy Qarýly Kúshteriniń Desantty-shabýyldaýshy áskeriniń 200-den astam qyzmetkeri jáne 60-qa jýyq tehnıka qatysady. Bıylǵy oqý-jattyǵý Reseı Federatsııasynyń Chelıabi oblysy, Shubarkól polıgonynda 22-29 tamyz aralyǵynda ótedi dep kútilýde.
Bul jattyǵýdyń negizgi maqsaty - Shanhaı yntymaqtastyq uıymyna múshe elderdiń antıterrorıstik operatsııalaryn birlesip ótkizip, ondaǵy máselelerdi birigip sheshý jáne áskerılerdiń daıyndyǵyn pysyqtaý. «Beıbit mıssııaǵa» jalpy 3 myńnan astam áskerı men 500 áskerı tehnıka toptastyrylmaq.
Oqý-jattyǵý barysynda qatysýshy elderdiń birin nemese bir bóligin terrorıster basyp alǵan jaǵdaıdaǵy áreketter pysyqtalady. Taldyqorǵandyq jaýyngerlerdiń mindeti - artıllerııalyq, zenıttik qarý jáne barlaýshy-shabýyldaýshy toptyń kúshimen terrorısterdiń kózin joıý. «Jetisý» polıgonynda áskerıler arnaıy tehnıkany synaqtan ótkizip, nysana kózdeý, birdeı qımyldaý áreketterin qaıtalady.
Jalpy mundaı aýqymdy jattyǵýlar 2010 jyldan beri júıeli túrde ótkizilip keledi.
