Jetisýǵa kelgen altaılyqtar Astananyń 20 jyldyǵyn toılady

TALDYQORǴAN. QazAqparat - Jetisýlyq slavıandar Astananyń 20 jyldyǵyn toılaýdy bastap ketti. Osyǵan oraı Tekeli qalasynda «Slavıan mádenıeti men jazýy» kúnderine arnalǵan aýqymdy forým uıymdastyryldy. «Astana - arman qala» dep atalǵan festıvalge Altaıdan qonaqtar kelip, jetisýlyq aǵaıynmen rýhanı baılanys ornatty, dep habarlaıdy QazAqparat tilshisi.

Altaıdan Alataýǵa bet alǵan slavıan ókiliniń biri Sergeı Mozgovoı. Aǵashqa jan bitirgen sheber birneshe týyndysyn Tekelige arnaıy alyp kelip, kórmege qoıdy. Barnaýyldan kelgen qonaq 14 jasynan bastap aǵashtan túıin túıýge mashyqtanǵanyn aıtady. Sózinshe, onyń keı týyndylary Reseı Prezıdentiniń jeke murajaıynda saqtalǵan.

«Altaı ólkesinen  Jetisýǵa 8 adam keldik. Tekeli qalasyna birinshi ret kelip turmyz. Astananyń 20 jyldyǵyna arnalǵan Slavıan mádenıetiniń forýmyna qatysqanymyzǵa óte qýanyshtymyz. Astana  jaınaı bersin. Astanaǵa qarap, biz Qazaqstannyń damýyn kórip jatyrmyz», -dedi sheber Sergeı Mozgovoı.

Jetisý jerinde «Slavıan mádenıeti men jazýy» kúnderine arnalǵan  forým jylda uıymdastyrylady. Dástúrge arnalǵan  shara bıyl Tekeli qalasynda ótip,  keshte  eki eldiń slavıandary jınalǵan qaýymǵa ónerlerin pash etti.

 «Ultaralyq, etnosaralyq dostyqty nyǵaıtý. Ár ulttyń óziniń mádenıetin, jazbasyn, tarıhyn, salt-dástúrin dáripteý, sony urpaqtan-urpaqqa jalǵastyrý. Sonyń arqasynda ulttardyń arasynda qarym-qatynasty, dostyqty nyǵaıtý bolyp tabylady», - dedi Tekeli qalasynyń ákimi Bahtııar Ónerbaev.

Reseı slavıandary Astanany jas qala retinde tanıtyndaryn aıtady. Alystan bolsa bas qalasynyń qaryshtap damýyna kýámiz, - deıdi Altaıdan kelgen qonaqtar.