Jetisýdyń jádigerleri - Elorda tórinde
TALDYQORǴAN. QazAqparat - Jetisý jerindegi Esik qorǵanynan tabylǵan Altyn adamnyń kóshirmesi, Jambyl Jabaevtyń dombyrasy men turmysta qoldanǵan buıymdary, Balpyq bıdiń urysta kıgen dýlyǵasy Astana tórindegi Qazaqstan Qarýly kúshteriniń əskerı-tarıhı mýzeıinde kelýshiler nazaryna usynylýda. Almaty oblysynyń Mədenıet kúnderi aıasynda óńir murajaılarynan barlyǵy 231 eksponat pen Kórkemsýret galereıasynan 30-ǵa jýyq kartına əkelingen, dep habarlaıdy QazAqparat tilshisi.
M. Tynyshpaev atyndaǵy oblystyq tarıhı-ólketaný mýzeıi dırektorynyń orynbasary Kúləsh Isabekovanyń aıtýynsha, kórmege Taldyqorǵandaǵy ólketaný mýzeıiniń, Kerbulaq aýdanyndaǵy Shoqan Ýəlıhanovtyń «Altynemel» memorıaldyq mýzeıiniń, Eńbekshiqazaq aýdanyndaǵy «Esik» memlekettik tarıhı mədenı qoryq mýzeıiniń eksponattary qoıylǵan. Al Taldyqorǵandaǵy Kórkemsýret galereıasy men Jarkent qalasyndaǵy Əbilhan Qasteevtiń kórkemsýret galereıasynan əkelingen akvarelmen, maıly boıaýmen qaǵazǵa, kenepke, aǵashqa salynǵan sýretter astanalyqtar men qala qonaqtarynyń qyzyǵýshylyǵyn týǵyzýda. Kelýshilerge ekskýrsovodtar qazaq, orys, aǵylshyn tilderinde jədigerler men olardyń tarıhy týraly keńinen əńgimeleıdi. Məselen, Balpyq bıdiń XVIII ǵasyrda qalmaqtarmen soǵys kezinde kıgen dýlyǵasyn urpaqtan urpaqqa kózdiń qarashyǵyndaı saqtap kelgen Jolaman aýylynda turatyn tikeleı urpaǵy 1980 jyldary murajaıǵa əkelip tapsyrǵan. Al jyr alyby Jambyldyń mýlıne jibimen toqyǵan portretin 1930 jyldary Ózbekstannyń on alty jasar sýretshisi aqynǵa syıǵa tartqan.
Aıta ketsek, «Astana EKSPO-2017» halyqaralyq kórmesine oraı ótip jatqan Almaty oblysynyń Mədenıet kúnderiniń aıasynda uıymdastyrylǵan tarıhy syrǵa tunǵan jədigerler men kórnekti kartınalar kórmesi aldaǵy tamyz aıynyń 7-sine deıin jalǵasatyn bolady.
