Jetisýdyń sharýalary 350 myń tonna qant qyzylshasyn ótkizbek
TALDYQORǴAN.QazAqparat - Bıyl Almaty oblysynyń sharýalary 350 myń tonnaǵa deıin qant qyzylshasyn ótkizýdi josparlap otyr. Ónimniń alǵashqy legin «Kóksý» qant zaýyty qabyldap aldy, dep habarlaıdy QazAqparat tilshisi.
Kóksý, Qaratal aýdandary men Qapshaǵaı qalasynyń sharýalary tátti túbirdiń alǵashqy legin jetkizdi.
«Bizdiń kútip otyrǵanymyz, sharýalar 300 myń tonnaǵa deıin qant qyzylshasyn ótkizýi kerek. Ol úshin barlyǵyn daıyndap qoıdyq. Qazan aıynan bastap tátti túbirdi óńdeýdi bastaımyz», - deıdi «Kóksý» qant zaýytynyń dırektory Altynbek Abatov.
Al oblystyq aýyl sharýashylyǵy basqarmasynyń basshysy Seksembaı Bekishevtiń aıtýynsha, aýa-raıy qolaısyzdyq tanytpasa sharýalar qant qyzylshasyn 40 kúnniń ishinde tolyqtaı ótkizedi. Byltyrǵydaı zaýyt aldynda uzyn-sonar kezektiń qalyptasýyna sharýalar ózderi túrtki bolmasa dep otyr.
«Mashınanyń turyp qalýyna sebep bolatyn bir jaǵdaı ǵana. Bul sharýalardyń bir ýaqytta, bir mezgilde kelgen kezde kezek kútýi bolady. Bizdiń esebimiz boıynsha eger de aýa raıy qolaıly bolatyn bolsa, 40 kún. Al, eger de aýa raıy jaýyn-shashyn bolyp, qolaısyzdyq tanytsa 60 kúnniń ishinde ónimdi qabyldap bitýimiz kerek», deıdi basqarma basshysy.
Aıta ketý kerek, bıylǵy maýsymda 10 jyl boıy toqtap turǵan «Aqsý» qant zaýyty da jumysyn bastaıdy. Bul jerge sol mańdaǵy Aqsý, Sarqan Alakól syndy aýdandardyń sharýalary ónimderin ótkizetin bolady. Al jalpy Almaty oblysynda qant qyzylshasyn egetin 600-ge jýyq sharýashylyq bar. Bıyl olar 9 myń 200 gektarǵa qant qyzylshasyn ekti. Eńbekkerler osy jyly dándi egýdiń jańa tehnologııasyn qoldana otyryp 350 myń tonna ónim almaq. Al, odan 30-35 myń tonna taza qant óndirý josparda bar.
