Jetisýdyń kıeli jerlerin zertteýge attanǵan ekspedıtsııa alǵashqy saparyn aıaqtady

TALDYQORǴAN. QazAqparat - Jetisý  óńirinde «Rýhanı jańǵyrý» baǵdarlamasyn júzege asyrý negizinde bastaý alǵan tarıhı ekspedıtsııanyń alǵashqy kezeńi aıaqtaldy. Zertteý toby 1500 shaqyrymdy júrip ótip,  «Shyńǵys hannyń shatyry», «Naızatapqan», «Qaraýyltóbe» syndy 15-ke jýyq tarıhı orynda bolyp qaıtty, dep habarlaıdy QazAqparat tilshisi.

Uıymdastyrýshylardyń aıtýynsha, sharanyń  basty maqsaty - oblystaǵy tarıhı mekenderdi óskeleń urpaqqa dáriptep, rýhanı qundylyqtardy nasıhattaý.

«Ár ólkeniń tarıhy men ózindik erekshelikteri bar. Ony bilý ár turǵynnyń mindeti. Osy oraıda, ekspedıtsııaǵa shyqqan top ár aýdannyń jastarymen, aqsaqaldarymen kezdesý ótkizdi. Onda tarıhı derekter men tyń maǵlumattar aıtyldy», - dedi І. Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev.

«Rýhy bekem, kıeli meken - Jetisý» ekspedıtsııasyn uıymdastyrý eki kezeń boıynsha josparlanǵan. Alǵashqysy aıaqtaldy, kelesi  kezeńi aldaǵy ýaqytta  uıymdastyrylmaq. Sońynan qatysýshylar jınalǵan málimetter boıynsha, 2 tomdyq jınaq shyǵarýdy kózdep otyr.

Aıta keteıik, osydan bir apta buryn Іlııas  Jansúgirov atyndaǵy JMÝ qyzmetkerleri men oblystyq Qazaqstan halqy Assambleıasynyń ókilderi avtosherýmen oblystaǵy tarıhı oryndardy aralaýǵa shyqqan edi. 40 adamnan quralǵan top Taldyqorǵan mańyndaǵy 5 aýdanǵa baryp qaıtty.