«Jetisýdyń» burynǵy fýtbolshysy 9 jylǵa sottaldy
TALDYQORǴAN. QazAqparat - Taldyqorǵanda «Jetisý» fýtbol komandasynyń burynǵy oıynshysyna qatysty apellıatsııalyq sottyń sheshimi shyqty, lep habarlaıdy QazAqparat tilshisi.
«Saıat Sárıev QR Qylmystyq kodeksiniń 99-baby 1-bóligi jáne 287-baby 2-bóligine sáıkes kináli dep tanylǵan bolatyn. Osyǵan oraı, oǵan 9 jylǵa bas bostandyǵynan aıyrý týraly jaza taǵaıyndaldy. Sot úkimi ózgerissiz qaldy», - dep málim etti Almaty oblysynyń soty.
Esterińizge sala keteıik, qylmys 2017 jylǵy qarashanyń 28-inen 29-yna qaraǵan túni, Kóksý aýdany Balpyq bı aýylynda ornalasqan býkmekerlik keńse mańynda bolǵan. Qylmystyq is materıaldaryna qaraǵanda, atalǵan aýyl turǵyny fýtbolshy Saıat Sárıevten aqsha talap etken. Al aqsha berýden bas tartqan fýtbolshyǵa qol kótergen. Óz kezeginde Sárıev avtokóliginen zańsyz saqtalǵan sholaq myltyǵyn alyp shyǵyp, aýyl turǵynyna atqan. Ol alǵan jaraqaty saldarynan oqıǵa ornynda mert boldy.
Sot Sárıevti kináli dep taýyp, ony 9 jylǵa bas bostandyǵynan aıyrý týraly úkim shyǵardy.
