Jetisýdyń Aqsý aýdanynda sharýa ıesi 10 myń gektardan asa jerdi paıdalanbaı otyr
«Іri kólemde jer telimin alyp, ıgermegen latýfındıster bar. Mysaly Aqsý aýdany Qapal aýylyndaǵy «Kúreńbel» sharýashylyǵy 10,3 myń ga jaıylymdy paıdalanbaýda. Bul máseleni 2017 jyldan beri aýyl turǵyndary kóterýde. Sonyń ózinde 2022 jyly nebári 366 ga jaıylymdyq jer qaıtarylǵan. Aýdan jáne aýyl ákimderi osymen ǵana shektelýde», - dedi Jetisý oblysy ákiminiń orynbasary Álibek Jaqanbaev óńir basshysynyń qatysýymen ótken keńeste.
Jalpy, Jetisý oblysynda 2022 jyly aeroǵashyqtyq zertteý arqyly barlyǵy 857,2 myń gektar paıdalanylmaıtyn aýyl sharýashylyǵy maqsatyndaǵy jer anyqtalǵan.
Júrgizilgen jumys nátıjesinde memleket menshigine 128,5 myń gektar qaıtaryldy.
Onyń ishinde 121,3 myń ga jaıylym, 6,9 myń ga egistik, 300 ga shabyndyq jer.
Bıyl 220 myń gektar paıdalanylmaıtyn jerdi memlekettik menshigine qaıtarý josparlanyp otyr.
Jyl basynan beri 64,8 myń gektar qaıtaryldy.
«Desek te, bul baǵyttaǵy jumysty Aqsý, Eskeldi, Kerbulaq, Panfılov aýdandary sylbyr júrgizip jatyr. Naqty aıtsam, 2022 jyly ortasha qaıtarý deńgeıi 13,2 paıyzdy qurasa, Eskeldi aýdany 7,4% ǵana oryndaǵan. Bıyl jer qaıtarý kólemi - 29,5 paıyz, Eskeldi aýdany 6,3%, Panfılov 8,2% ǵana oryndaǵan», - dedi Álibek Jaqanbaev.
Ákim orynbasarynyń sózinshe, aýyl mańyna jaqyn ornalasqan qaıtarylǵan jaıylym tıisti josparǵa engizilip, halyq muqtajyna, al egistik jerler naqty aýylsharýashylyq paıdalanýshylarǵa konkýrs arqyly tabystalýy tıis bolatyn.
Alaıda, búgingi kúni Kerbulaq aýdanynan basqa aýdandarda jospar ázirlenip, bekitilmegen.
«Osynyń saldarynan búgingi kúnge aýyl turǵyndarynyń mal jaıýyna qajet qosymsha 688 myń gektar jaıylym jerin bekitip bere almaı otyrmyz. Jerdiń maqsatty paıdalanýyn qadaǵalaý - tikeleı aýyl ákimderiniń mindeti. Alaıda jergilikti jerlerde okrýg ákimderi qadaǵalaý turmaq, jer paıdalanýshylardy jáne qandaı maqsatta paıdalanyp otyrǵanynan habarsyz. Bilgenniń ózinde esh sharasyz otyrady. Onyń sebebi - zańǵa sáıkes ózine júktelgen tikeleı mindetin tolyq bilmeıtindiginde», - dedi Jetisý oblysy ákiminiń orynbasary Álibek Jaqanbaev.
