Jetisýdaǵy «Dostyq» keden beketinde 500 kólik kepteliste tur

TALDYQORǴAN.QazAqparat - Jetisý oblysyndaǵy «Alakól» keden beketindegi kólik keptelisi eki-úsh kúnde sheshiledi. Jaqyn arada elektrondyq kezek júıesin engizý máselesi qarastyrylyp jatyr, - dep habarlaıdy QazAqparat tilshisi Jetisý oblysy ákimdiginiń baspasóz qyzmetine silteme jasap.

Qytaı Halyq Respýblıkasy basqa elderden kiretin júk kólikteriniń sanyn ulǵaıtýyna baılanysty keden beketinde keptelis paıda bolǵan. Dostyqqa qaraı qazaqstandyqtardan bólek, Reseı jáne Belarýs memleketterinen de aǵylyp jatqan kólikter kóp.

Osy ýaqytqa deıin shekaradan kúnine 10-15 qana júk kóligi ótse, qazir bul kórsetkish birneshe eselengen. Sondyqtan keden beketine qosymsha mamandar jumyldyryldy. Sáıkesinshe, jumys ýaqyty da tańǵy 8:00-den keshki saǵat 20:00-ge deıin uzartyldy.

«Buǵan deıin keden beketi tańǵy 8:00-den 17:00-ge deıin jumys isteıtin. Jumys ýaqytyn qosymsha 3 saǵatqa sozdyq. Qujat skanerleýshi jáne tekserýshi mamandardy kóbeıttik. Jalpy sany 31 adam qyzmet etýde. Dúısenbiden bastap taǵy 8 adam qosylady. Qazir shekaradan kúnine 100 júk kóligi ótedi. Ár kólikti tekserý ýaqytyn da jyldamdatyp jatyrmyz», - deıdi oblystyq memlekettik kirister departamentiniń basshysy Talǵat Qozybekov.

Keden beketinde qazir 500-deı kólik tur. Olardy mamandar aldaǵy 2-3 kúnde tekserip ótkizbek. Al, kezek pen tártip máselesin jergilikti ákimdik, polıtsııa retteıdi.

«Bizde jedel shtab qurylǵan. Onyń quramynda keden jáne shekara qyzmeti, polıtsııa bólimi men kólik prokýratýrasy qyzmetkerleri bar. Qalyptasqan jaǵdaıǵa baılanysty shtab otyrysyn ótkizdik. Máseleni jan-jaqty talqylap, sheshý joldaryn qarastyrdyq. Kezekti retteý úshin elektrondy júıe qalyptasqanǵa deıin esepke alý jáne ońtaılandyrý joldary qarastyryldy», - deıdi Alakól aýdanynyń ákimi Almas Abdınov.

Jalpy, kólik ótkizý áleýetin arttyrý baǵytynda keden beketin keńeıtý jumystary qolǵa alyndy. Maýsym aıynda qosymsha avtomobıl ótkizý pýnktiniń qurylysy bastaldy. Jobany iske asyrý bir jarym jylǵa josparlanǵan. Onda táýligine ary-beri 1200-deı kólik tekserilip ótetin bolady.

Esterińizge sala ketsek, buǵan deıin Qorǵastaǵy «Nur joly» ótkizý beketinde de kólik keptelisi qalyptasqan edi. Qazir bul bekette elektrondyq kezekke qoıý júıesi engizilip, másele sheshimin tapty. Nátıjesinde qazir kúnine beket arqyly esh kedergisiz 100 shaqty kólik ótedi. Eń bastysy, osy ádis arqyly saladaǵy barlyq deldaldyq jáne alypsatarlyq júıeler tolyǵymen joıyldy.