Jetisýda jeti balany baýyryna basqan januıa «Mereıli otbasy» atandy
TALDYQORǴAN.QazAqparat - Búgin Taldyqorǵanda oblystyq «Mereıli otbasy» baıqaýynyń jeńimpazdary anyqtaldy. Jeti balany baýyryna basqan Jambyl aýdanynyń Káribaevtar januıasy birinshi oryndy jeńip aldy. Jeńimpaz otbasyǵa 1 mln teńgeniń sertıfıkaty tabys etildi, dep habarlaıdy QazAqparat tilshisi.
Qaıyrymdylyq jasaýdy basty maqsat etken Birjan men Álııa ózderiniń eki ulymen qatar, qazaq, orys, nemis ult ókilderiniń jeti balasyn baýyryna basyp, búginde úlken otbasyǵa aınalǵan. Jeńimpaz januıaǵa jınalǵan qaýymnyń qoshemeti zor boldy. Qurmetke bólengen otbasynda otaǵasy - kásipker, al onyń jary Álııa - jýrnalıst.
«400 den asa otbasynyń ishinde birinshi oryndy alǵanymyzǵa óte qýanyshtymyz. Qýanyshtan jylap aldym. Baýyrymyzǵa basqan balalarymnyń ishinde túrli ult ókilderiniń, ıaǵnı nemis, orys jáne sheshen balalary bar. «Mereıli otbasy» baıqaýyna óte rızashylyǵymdy bildiremin. Árıne kóptegen suraq qoıady, bul balalardy asyrap alýdaǵy maqsatyńyz qandaı degen turǵyda. Men shynymdy aıtsam, ózimniń eki ulym bar, qyzym bolsa dep armandaıtynmyn. Qyz balany baýyryma basamyn dep baryp, 7 balany alyp qaıttym. Óıtkeni balalardyń bári súıkimdi. Men ár bala baqytty januıada tárbıelense dep tileımin. Balalarymnyń eń úlkeni 15 jasta, kishkentaıy 5- te. Bala meniń baýyr etim. Olardyń bolashaǵy úshin biz aıanbaı eńbek etemiz», - dedi «Mereıli otbasy» oblystyq baıqaýynyń birinshi oryn ıegeri Álııa Káribaeva.
Káribaevtar otbasymen qatar birinshi oryndy taldyqorǵandyq Myqtybek Rahymbekovtyń áýleti jeńip aldy. Endi qos januıa respýblıkalyq «Mereıli otbasy» baıqaýyna qatysady. Sondaı-aq bul baıqaýda ekinshi oryndy Alakól aýdanyndaǵy Qabanbaı aýylynyń Dúısebaevtar áýleti enshiledi.
«Bizdiń qazaq otbasyn Otanǵa teńegen óte órkenıetti halyq. Bul baıqaý bizdiń memleketimiz úshin, ár otbasy úshin kerek. Óıtkeni ulttyń bolashaǵy - óziniń urpaǵynda. Osy urpaqty tárbıeleý úshin, ózimizdiń ata-babamyzdan qalǵan ulaǵatty urpaq boıyna sińirý úshin «Mereıli otbasy» baıqaýy óte qajet. Bizdiń úıdiń otaǵasy óziniń sanaly ǵumyrynyń bárin qurylys ınjeneri bolyp jáne partııanyń keńes organdaryna arnap kele jatqan jan. Men ózim bolsam 45 jyl qazaq tili jáne ádebıet pániniń muǵalimi boldym. Myńdaǵan shákirtterdi tárbıeledim. Sonyń ishinde 60-tan astamy «Altyn belgi» jáne erekshe attestat ıegeri boldy. Búginde olar bizdiń Táýelsiz elimizdiń túkpir-túkpirinde eńbek etip, ár túrli salada jumys isteıdi», - dedi Alakól aýdanynyń turǵyny, oblystyq «Mereıli otbasy» baıqaýynyń ekinshi oryn ıegeri atanǵan Uljalǵas Dúısebaeva.
\
Aıta ketý kerek, Almaty oblysynda ótken «Mereıli otbasy» baıqaýyna jalpy 400 den astam otbasy qatysty.
