Jetisýda týrıster úshin jańa júıe iske qosylady
TALDYQORǴAN. QazAqparat - Jetisý jerinde tuńǵysh ret týrıster úshin jańa elektrondy júıe iske qosylady. Endi kez-kelgen turǵyn úshin Almaty oblysyndaǵy demalys oryndary jaıly aqparat alý ońaı bolmaq, dep habarlaıdy QazAqparat tilshisi.
Oblys aýmaǵynyń kez-kelgen jerinde, naqtyraq aıtqanda jol boıynda, janar maı beketterinde, qoǵamdyq oryndarda týrıstik navıgatsııalyq júıe iske qosylatyn bolady. Turǵyndar «QR» kod arqyly mobıldi telefonmen qajetti týrıstik nysandar boıynsha tolyq aqparat ala alady. Al atalǵan qyzmetti paıdalaný úshin «Play market» jelisinen «QR» kodty oqıtyn baǵdarlamany júkteýi qajet.
Jańa júıede nysannyń ornalasý mekenjaıy, qyzmet túrleri, baǵyty, sýretteri kórsetiledi. Oblystyq týrızm basqarmasy basshysynyń mindetin atqarýshy Arqaý Shantaevtyń aıtýynsha, atalǵan joba kezeń-kezeńmen iske asady. Al júıeniń negizgi maqsaty kelýshi týrısterdi aqparattandyryp, erkin baǵyt alýyna múmkindik jasaý.
