Jetisýda shomylý maýsymy bastalar aldynda sý sapasy tekserildi

TALDYQORǴAN. QazAqparat – Jetisý oblystyq sanıtarııalyq-epıdemıologııalyq baqylaý departamentiniń mamandary shomylý maýsymy aldynda Alakól, Balqash kólderinen synama aldy. Sý sapasy bakterıologııalyq jáne basqa da kórsetkishterge tekserildi, dep habarlaıdy QazAqparat tilshisi.

Jetisý oblystyq sanıtarlyq-epıdemıologııalyq baqylaý departamentiniń málimetinshe, óńirdegi 84 jaǵalaý mamandardyń baqylaýyna alynǵan.

Onyń 74 - Alakól kóliniń boıynda, 10 - Balqash kóliniń jaǵasynda ornalasqan.

Shomylý maýsymy bastalar aldynda «Alakól» men «Balqash» kólderinen mıkrobıologııalyq jáne sanıtarııalyq – hımııalyq kórsetkishterge 39 sý synamasy jáne 39 topyraq synamasy, parazıtologııalyq kórsetkishterge 30 sý synamasy jáne 39 topyraq synamasy alynyp zertteldi.

Tekserý nátıjesi gıgıenalyq normatıvterge sáıkes keledi.

«Demalys aımaqtarynda alańdatýshylyq týǵyzatyn máselelerdiń biri – demalýshylardan keıin jınalmaı qalatyn qoqystar. Mundaı nemquraılyqtyń saldarynan sý aıdyndary men jaǵalaýdaǵy topyraq lastanady jáne demalýshylardyń juqpaly, parazıttik aýrýlardy juqtyrý qaýpi joǵary bolady»,- dep atap ótti oblystyq departamentten.