Jetisýda qyzyl kitapqa engen janýarlardy atyp, aǵash keskender ustaldy
TALDYQORǴAN. QazAqparat - Almaty oblysynda qyzyl kitapqa engen ańdardy atyp, torańǵy aǵashyn kesken bir top azamattar ustaldy. Óńirde «Brakoner» arnaıy operatsııasy bastaldy, dep habarlaıdy QazAqparat tilshisi.
Reıd barysynda 37 tabıǵatty qorǵaý zańnamalaryn buzý faktisi anyqtaldy. Onyń ishinde 11 fakti boıynsha qylmystyq tergeý bastalǵan. Tabıǵatqa qasaqana zııan keltirgen brakonerlerden 15 tekshe metr sekseýil men Qyzyl kitapqa engen torańǵy aǵashy tárkilendi. Al Sarqan aýdany aýmaǵynan elik atyp alǵan Taldyqorǵan qalasynyń turǵyny qolǵa tústi.
Sonymen qatar, Uıǵyr aýdanynda taýteke atqan bir top azamat quryqtaldy. Olardan bes myltyq tárkilendi. Tórt qarýdyń qujattary bolmaı shyqty. Almaty oblystyq ІІD Baspasóz qyzmetinde osy derekter boıynsha saraptama taǵaıyndalyp, qylmystyq is qozǵalǵany aıtyldy.
Sondaı-aq, arnaıy shara barysynda 26 adam ákimshilik jaýapkershilikke tartyldy. Olardyń 8-i ań aýlaý, 9-y balyq aýlaý erejelerin buzǵan. Taǵy 8 azamat qarý-jaraqty saqtaý, tasymaldaý erejelerin saqtamaǵan.
