Jetisýda fıtnes-zalda jumys isteıtin jigit áıelderdi aldap, aqsha jymqyrǵan
TALDYQORǴAN. QazAqparat - Almaty oblysynda polıtseıler birneshe alaıaqtyq jasady degen kúdikpen 26 jastaǵy er adamdy ustady. Qylmystyq tergeý materıalyna sáıkes, Talǵar aýdandyq polıtsııasyna 15 áıel jáne eki er adam atalǵan azamattyń alaıaqtyǵy jóninde aryzdanǵan, dep habarlaıdy QazAqparat tilshisi.
Quqyq qorǵaý organdarynyń pikirinshe, tergeý aıasynda jábirlenýshilerdiń sany ósýi múmkin. Sebebi, polıtsııaǵa aryz-shaǵymdar áli de túsip jatyr.
«Kúdikti - Túrkistan oblysynyń 26 jasar turǵyny. Ol buǵan deıin de alaıaqtyǵy úshin qylmystyq jaýapkershilikke tartylǵan jáne probatsııalyq baqylaýdy buzǵany úshin izdestirilip jatqan bolatyn. Qazir ol qamaýǵa alyndy»,-dep málimdedi Almaty oblysy polıtsııa departamentiniń baspasóz qyzmeti.
Anyqtalǵandaı, kúdikti fıtnes-zaldardyń birinde jumys istegen.
«Barlyq jaǵdaıda kúdikti óziniń aýrý ekenin, jaǵdaıynyń nashar ekenin alǵa tartqan. Mysaly, operatsııaǵa aqsha kerek ekenin aıtyp, áıelderdiń aıaýshylyǵyn týǵyzǵan, osylaısha aldap, aqshalaryn alǵan»,- dep tolyqtyrdy polıtsııa qyzmetinen.
Kúdikti osy jyldyń sáýir aıynan bastap Talǵar aýdanyndaǵy aýyldyń birinde turyp jatqan. Ustalǵan azamattyń basqa da osyǵan uqsas faktilerge qatysy bar-joǵyn aýdandyq polıtsııa qyzmetkerleri tekserýde.
