Jetisýda deportatsııalanǵan ulttardyń urpaqtary qazaq halqyna alǵys aıtty (FOTO)
ASTANA. QazAqparat - Taldyqorǵan qalasyndaǵy І. Jansúgirov atyndaǵy Mádenıet saraıynda Alǵys aıtý kúnine oraı saltanatty jıyn ótti. Merekelik sharaǵa qatysýshylardy oblys ákiminiń orynbasary Baqtııar Ónerbaev quttyqtady.
B. Ónerbaevtyń Memleket basshysy júrgizip otyrǵan saıasattyń arqasynda elimizdegi kóptegen ulystardyń basyn biriktiretin toleranttylyqtyń teńdessiz ınstıtýty Qazaqstan halqy Assambleıasy qurylǵanyn, Alǵys aıtý kúniniń Prezıdent Jarlyǵymen dál Assambleıanyń qurylǵan kúnine oraı belgilenýi barlyq etnostardyń bir-birine dostyq kóńil men baýyrlastyq peıilderi úshin rızashylyq bildirýine múmkindik beretinin atap ótti.
«Qurmetti jerlester! Merekelerińiz qutty bolsyn! Osy aıtýly merekemen barshańyzdy shyn júrekten quttyqtaımyn. Sizderge myqty densaýlyq, beıbit ómir tileımin. Búgingi Alǵys aıtý kúni barshańyzǵa qýanysh syılasyn! Elimiz aman, jurtymyz tynysh bolsyn!», - dedi B. Ónerbaev.
Sóz alǵan Qazaqstan halqy Assambleıasynyń múshesi, oblystyq «Ognı Alataý» gazetiniń bas redaktory Atsalım Idıgov, Taldyqorǵan koreıleri Assotsıatsııasynyń Aqsaqaldar keńesiniń tóraǵasy A. Kım, oblystyq Ardagerler keńesiniń tóraǵasy A. Sydyq Qazaqstanǵa repressııa jyldarynda túrli ult ókilderiniń deportatsııalaný tarıhyna toqtalyp ótti. Árbir sóıleýshi óz sózinde qazaq halqynyń qonaqjaılyǵy, tózimdiligi men meıirimdiligi jer aýdarylyp kelgen etnos ókilderine jańa da jarqyn ómir syılaǵanyn erekshe atap ótti.
І. Jansúgirov atyndaǵy Jetisý memlekettik ýnıversıtetiniń stýdenti Olesıa Tadjıeva jastardyń atynan sóz aldy. Ol jastardyń óz eliniń tarıhyn, ótkenin qurmetteıtinin, bolashaqqa Qazaqstan halqynyń beıbitshilik, turaqtylyq, kelisim sııaqty basty qundylyqtaryn alyp baratyndaryn senimmen aıtty.
Merekege arnap qoıylǵan kontserttik baǵdarlamada Qazaqstanda turatyn túrli ult pen ulystardyń ánderi shyrqalyp, bıleri bılendi. Bul shara elimizdiń mádenıeti men dástúr baılyǵynyń, halqymyzdyń ulylyǵy men sulýlyǵynyń jarqyn kórinisi boldy. 
