Jetisýda «Bir ýys bıdaı» fılmi qalyń kórermenge jol tartady
TALDYQORǴAN. QazAqparat - Almaty oblystyq «Jetisý» telearnasy 31 mamyr - asharshylyq pen saıası qýǵyn-súrgin qurbandaryn eske alý kúnine oraı kórkem fılm túsirdi, dep habarlaıdy QazAqparat tilshisi.
Jańa týyndy HH ǵasyrdyń alǵashqy jartysynda qaza tapqan bes mıllıondaı qazaqtyń rýhyna arnalǵan. Muhtar Maǵaýınniń áńgimesiniń jelisi boıynsha túsirildi. Stsenarıin jazǵan Serik Ábikenuly. Fılmge Almaty oblystyq Bıken Rımova atyndaǵy drama teatrdyń jáne Ǵabıt Músirepov atyndaǵy balalar jáne jasóspirimder teatrynyń akterlary qatysty.
«Bir ýys bıdaı» - bir otbasy tragedııasy arqyly tutas ult qasiretin kórsetýdi maqsat etedi. Shyǵarmashyl ujym náýbet jyldardaǵy qazaq halqynyń basyndaǵy qasiretti shynaıy jetkizýge tyrysty. Túsirilim jumystary Almaty oblysynyń Qaratal aýdany mańynda júrgizildi. Kórkem fılm 31 mamyr kúni saǵat 20:35 te «Jetisý» arnasynyń efırinen kórsetiledi.
Aıta keteıik, bul «Jetisý» arnasy jaryqqa shyǵarǵan alǵashqy fılm emes. Buǵan deıin «Qudaıy qonaq» komedııalyq týyndysy 2015 jyly jaılaýda túsirilip, kórermenderdiń joǵary baǵasyn alǵan bolatyn. Bul fılmniń basty rolderin telearnanyń shyǵarmashyl toby somdady.
