Jetisýda ańǵa shyǵar aldynda tanysyn atyp tastaǵan er adam ustaldy

TALDYQORǴAN. QazAqparat - Jetisýda tanysyn ańshy myltyǵymen atqan er adam ustaldy, dep habarlaıdy Polisia.kz.

Derek Kóksý aýdanynda tirkeldi. 2 qarasha kúni keshki ýaqytta Maqanshy aýylynan 45 jastaǵy er adam oq jaraqatymen aýrýhanaǵa jatqyzyldy.

Tergeý barysynda jábirlenýshini Taldyqorǵan qalasynan qonaqqa kelgen jaqyn tanysy myltyqpen jaralaǵany belgili boldy.

– Er adamdar ań aýlaýǵa shyǵýdy josparlaǵany aldyn ala anyqtaldy. Іshimdik ishý kezinde olardyń arasynda janjal týyndaǵan. Sonyń saldarynan qonaq ańshy myltyǵymen úı ıesiniń aıaǵynan atqan. Qazir densaýlyqqa qasaqana aýyr zııan keltirý deregi boıynsha sotqa deıingi tergeý amaldary júrgizilip jatyr. Kúdiktige tirkelgen 12 kalıbrli IJ myltyǵy tárkilenip, qylmystyq is materıaldaryna zattaı dálel retinde tigildi, – dep habarlady Kóksý aýdandyq polıtsııasy.

Tergeý barysynda ustalǵan kúdiktige qatysty kelýge mindetti protsessýaldyq májbúrleý sharasy tańdaldy.