Jetisýda 150 medıtsınalyq uıymnan kemshilikter tabylyp, 10 mln teńge aıyppul salyndy
ASTANA. QazAqparat - Almaty oblysynda 150 medıtsınalyq uıym qyzmetinde zańbuzýshylyqtar anyqtaldy. Bul týraly QR Densaýlyq saqtaý mınıstrliginiń Qoǵamdyq densaýlyq saqtaý komıtetinen málim etti, dep habarlaıdy QazAqparat tilshisi.
Komıtet dereginshe, 2018 jyly Almaty oblystyq qoǵamdyq densaýlyq saqtaý departamenti 171 densaýlyq saqtaý nysanyna tekserý júrgizip, onyń 150-i sanıtarlyq-epıdemıologııalyq talaptardy buzǵanyn anyqtaǵan. Barlyq medıtsınalyq uıymda juqpaly aýrýlardyń aldyn alý boıynsha epıdemııaǵa qarsy jáne aldyn alý is-sharalary men sanıtarlyq-gıgıenalyq talaptardyń buzylýy belgili bolǵan. Anyqtalǵan kemshilikterge oraı jaýapty tulǵalarǵa jalpy somasy 10 mln 634 myń 825 teńgeni quraıtyn 390 aıyppul salynǵan. Halyqtyń sanıtarııalyq-epıdemıologııalyq salamattylyǵy salasyndaǵy QR zańnamasynyń talaptaryn buzý faktilerin joıý týraly 137 uıǵarym berilip, 2 materıal sotqa jiberilgen.
«Tekserýler nátıjesinde Almaty oblysynda esepte turǵan 1094 densaýlyq saqtaý nysanynyń arasynda kúrdeli jóndeý júrgizýdi qajet etetin 65 mekeme anyqtaldy. Onyń ishinde bir nysan qurylysy jáne eki nysanda kúrdeli jóndeý jumystary júrgizilip jatyr, 2019 jyldyń josparyna - 5, al 2020-2025 jyldarǵa - 27 nysan engizildi», - dep atap ótedi komıtetten.
Jalpy, 2018 jyly Almaty oblysynda 13 densaýlyq saqtaý nysany salynyp, paıdalanýǵa berildi. 5 nysanǵa kúrdeli jóndeý júrgizildi. Bul halyqqa kórsetiletin medıtsınalyq qyzmetterdiń sapasy men qaýipsizdigin aıtarlyqtaı jaqsartýǵa múmkindik berdi.
