Jetisý óńirinde servıstik-daıyndaý ortalyqtardyń sany artýda
TALDYQORǴAN. QazAqparat - Almaty oblysynda sońǵy 7 jylda 40-qa jýyq servıstik daıyndaý ortalyǵy ashyldy. «Jetisý» áleýmettik-kásipkerlik korporatsııasy qolǵa alǵan bul joba aýylsharýashylyǵyn kooperatsııalaýǵa baǵyttalǵan, dep habarlaıdy QazAqparat tilshisi.
Servıstik-daıyndaý ortalyqtary usaq sharýashylyqtardy biriktirip, eńbek ónimdiligin arttyrýǵa baǵyttalǵan arnaıy mehanızm. Búgingi tańda mundaı ortalyqtar Almaty oblysynyń 12 aýdany men Qapshaǵaı qalasynda qurylǵan. Olarǵa memleket tarapynan qarjy bólinip, aýylsharýashylyǵy tehnıkasy alynady. Ortalyqtar sharýalarǵa erte kóktemnen kúzgi jıyn-teringe deıin qyzmet kórsetedi. Bıyl bul jumys qarqyndy júrip, eńbek ónimdiligi 1,5 esege artty. Jalpy Almaty oblysynda servıstik daıyndaý ortalyqtary qant qyzylshasy, júgeri, kartop jáne dándi daqyldar baǵytynda jumys isteýde. Oblys boıynsha 250 sharýa qojalyǵy osy aýylsharýashylyq qurylymy negizinde toptasty. 700 turaqty, maýsymdyq 2500 jumys orny ashyldy.
Máselen 2016 jyly Eskeldi aýdanyndaǵy úsh iri sharýa qojalyǵy negizinde «Syrymbet» servıstik-daıyndaý ortalyǵy quryldy. Quny 157 mln teńge bolatyn 11 birlik tehnıka alyndy. Bul servıstik ortalyqtyń negizgi baǵyty qant qyzylshasyn óndirý, deıdi sharýa qojalyǵynyń jetekshisi Aıdyn Dúısenbınov. Bıyl ortalyq kúshimen sharýalar Kóksý qant zaýytyna 20 myń tonna qant qyzylshasyn ótkizdi.
Elbasynyń irilendirý saıasatyn jergilikti jerde tikeleı oryndap jatqan «Jetisý» áleýmettik-kásipkerlik korporatsııasy. Búgingi tańda 39 servıstik-daıyndaý ortalyǵy quryldy. Olardyń 24-i qant qyzylshasyn óndirýge baǵyttalǵan. «Jetisý» ÁKK departament dırektory Marat Asanovtyń aıtýynsha sońǵy 7 jylda 7,7 mlrd teńgege aýylsharýashylyq tehnıkasy alyndy. Sharýalardyń aldy lızıngtik boryshyn ótep bitip, tehnıkany menshigine ótkizip alǵan.
