Jetisý óńirinde mal urlyǵy jappaı ashylyp jatyr
TALDYQORǴAN.QazAqparat - Almaty oblysynda mal urlyǵynyń aldyn alý men barymtashylardyń jolyn kesý jumysy kúsheıtildi, dep habarlaıdy QazAqparat tilshisi.
Arnaıy is-shara barysynda tártip saqshylary buǵan deıin qoldy bolǵan maldardy izdestirý boıynsha sharalaryn qabyldaýda. Olar mal urlyqtaryna qatysy bar «eski isterdi» zerdeleýde. Osyǵan oraı mal bazarlaryn, qystaqtar men sharýa qojalyqtaryn, mal soıý oryndaryn tekserýde. Sondaı-aq, polıtseıler qoıǵan blok-posttarda mal jáne et ónimderin tasymaldaýshy avtokólikterdi muqııat qarap jatyr.
«Sońǵy bir kún ishinde óńirde mal urlyǵynyń 6 deregi ashyldy. Onyń úsh deregi buǵan deıin jasalǵan qylmystar. Іle, Panfılov jáne Sarqan aýdandarynda barymtashylar «urlyqtyń izi sýymaı» qolǵa tústi. Jambyl, Eńbekshiqazaq jáne Qarasaı aýdandarynda buǵan deıin qoldy bolǵan mal urlyǵyna qatysy bar kúdiktiler anyqtaldy. Jalpy alǵanda, tártip saqshylary jyl basynan beri urylar úptep ketken 200-ge tarta maldy taýyp, zańdy ıelerine qaıtarǵan. Onyń jetpisten astamy - jylqy maly»,- dep málimdedi Almaty oblysy PD baspasóz qyzmeti.
Aıta keteıik, bıyl polıtseıler óńirde jymysqy oılaryn júzege asyrǵan birneshe barymtashylar tobynyń jolyn kesti. Olar - Kegen, Іle, Eńbekshiqazaq jáne Jambyl aýdandarynda mal urlyǵyn kásip qylǵandar.
«Kegen aýdany turǵyndarynyń 88 bas jylqysyn urlaǵan qylmystyq topqa qatysty tergeý aıaqtalyp, is sotqa jiberildi. Tergeý barysynda urlanǵan maldy satyp alýshy Talǵar aýdanynyń 32 jastaǵy turǵyny ekeni anyqtaldy. Qazirgi ýaqytta satyp alýshyǵa qatysty tergeý isi bólek óndiriske alynyp, ol oblystyq Tergeý basqarmasy basshylyǵynyń qatań baqylaýynda»,- atap ótti oblystyq polıtsııa ókilderi.
Óńirdegi barlyq avtojoldarǵa qoıylǵan blok-posttarda bir kún ishinde mal tasymaldaǵan 80 avtokólik tekserilgen. 12 júk kóliginiń júrgizýshileri tıisti qujattary bolmaǵandyqtan jaýapkershilikke tartyldy.
