Jetisý ónerpazdary Ispanııada ótken halyqaralyq bı festıvalinen jeńispen oraldy
ASTANA. QazAqparat - Taldyqorǵandyq "Solnyshko" horeografııalyq ansambli Ispanııanyń Lloret de Mare qalasynda uıymdastyrylǵan "SUMMER TALENT LEAGUE -2017" halyqaralyq festıvaline qatysyp, Gran-prı júldesin jeńip aldy. Bul týraly Almaty oblysynyń óńirlik kommýnıkatsııalar qyzmeti alańynda Taldyqorǵan qalasyndaǵy Oqýshylar saraıynyń dırektory Esbolova Lıazzat baıandady.
"SUMMER TALENT LEAGUE -2017" halyqaralyq festıvali - túrli janrlarda óner kórsetetin shynaıy jas talanttardyń jıyny. Festıvalge 10-nan asa memleket qatysyp, eń úzdigi Grýzııa eline shaqyrtý aldy. Atalmysh festıval qalanyń basty alańynda ótkeni aıtyldy.
«Halyqaralyq festıvalge ujymymyzdan 12 oqýshy men 3 muǵalim baryp qaıttyq. Bizdi Ispanııa eliniń resmı ókilderi óte jaqsy qarsy aldy. Bul el óziniń tamasha tabıǵaty men tańǵajaıyp ǵımarattarymen tańqaldyrdy. Konkýrstyń birinshi kúnin qazaq bıimen ashtyq. Ulttyq kıimimizge qyzyqqandar sany kóp bolǵandyqtan, qyzdarymyz el nazarynda júrdi. Ekinshi kúni horezm bıi bılendi. Ol da óziniń erekshe bı qoıylymdarymen erekshelendi. Qatysýshylar kelesi kúni Barselona qalasyna ekskýrsııalyq saparmen bardy. Sonymen qatar ıntellektýaldy oıyndar men oıyn-saýyq baǵdarlamalaryna qatysyp qaıtty», - dedi «Solnyshko» ansambliniń jetekshisi Tatıana Matveevna.
