Jetisý oblysynyń Kóksý aýdanynda jylý qazandyǵy jarylyp, jumysshy qaza tapty

TALDYQORǴAN. QazAqparat – Jetisý oblysynyń Kóksý aýdanynda jylý qazandyǵy jarylyp, bir jumysshy qaza tapty, dep habarlaıdy QazAqparat tilshisi.

«1 sáýir kúni saǵat 8:52-de Kóksý aýdany 10 jyldyq Qazaqstan aýylynda jalpy aýdany 22 sharshy metr jylý qazandyǵy jaryldy. Apat saldarynan oqıǵa ornynda bir jumysshy qaza tapty», - dep málim etti Kóksý aýdanynyń ákimi Márlen Kólbaev.

Qaza bolǵan jumysshy 58 jasta. Bes balasy bar, barlyǵy eresek.

Kóksý aýdany ákimdigi baspasóz qyzmetiniń málimetinshe, jumysshy jańadan salynyp jatqan mektepke baryp, jylytý qazandyǵy ornalasqyn ǵımaratqa kirgen. Kirgen ýaqytta qazandyq jarylǵan.

Qazirgi ýaqytta qaýip joq. Jarylystyń sebebi anyqtalyp jatyr.