Jetisý oblysynyń ekojúıesin jaqsartý boıynsha jeke jol kartasyn ázirleý qajet

TALDYQORǴAN. QazAqparat – Jetisý oblysynyń ekojúıesin jaqsartý boıynsha jeke jol kartasyn ázirleý qajet. Bul týraly Ekologııa, geologııa jáne tabıǵı resýrstar mınıstri Serikqalı Brekeshevtiń oblys turǵyndarymen jáne azamattyq sektor ókilderimen kezdesýinde aıtyldy, dep habarlaıdy QazAqparat vedomstvonyń baspasóz qyzmetine silteme jasap.

Mınıstr atap ótkendeı, Jetisý oblysyndaǵy ekologııalyq jaǵdaı salystyrmaly túrde qolaıly. Oblysta lastaýshy zattar shyǵaryndylarynyń naqty kólemi 10,8 myń tonna bolǵan, bul – ótken jylmen salystyrǵanda 6,4%-ǵa (10,1 myń tonna) tómen. Buǵan tabıǵatty qorǵaý sharalaryn júzege asyrý arqyly qol jetkizildi.

Sondaı-aq, Almaty oblysy boıynsha Jol kartasy aıasynda qaralǵan 8 is-sharanyń 6-ýy Jetisý oblysyna tıesili. Máselen, ótken jyly Taldyqorǵan qalasynyń, Kóksý jáne Eskeldi aýdandarynyń 6 qazandyǵy gazǵa aýystyryldy. Eskeldi aýdanynyń káriz jelileri men tazartý qurylystaryn qaıta jańartý jumystary júrgiziláp jatyr. Taldyqorǵan qalasynyń LED-ekrandarynda Qazgıdromet usynatyn atmosferalyq aýanyń sapasy týraly aqparat ornalastyrylady.

Aımaq ákiminiń orynbasaryna arnaǵan sózinde mınıstr oblystardyń bólinýin eskere otyryp, aldaǵy qarasha aıynyń sońyna deıin jurtshylyqpen birlesip, Jetisý oblysynyń ekojúıesin jaqsartý boıynsha jeke jol kartasyn ázirleý qajettigin atap ótti.