Jetisý oblysynyń barlyq múmkindikterin kólik-logıstıkalyq salaǵa tartý qajet - Úkimet basshysy
Taldyqorǵan áýejaıynda Úkimet basshysyna Taldyqorǵan - Qalbataý - Óskemen, Úsharal - Dostyq, Saryózek - Kóktal, Lepsi - Balqash avtojoldaryn jáne Úsharal qalasyndaǵy áýejaıdyń ushý-qoný jolaǵyn qaıta jańartý, sondaı-aq oblystyń Alakól aýdanynda tranzıttik ınfraqurylymdy damytý týraly baıandama jasaldy.
Álıhan Smaıylov qabyldanyp jatqan sharalar men qalyptasyp otyrǵan syrtqy ekonomıkalyq ahýaldyń nátıjesinde Qazaqstan Azııa men Eýropa arasyndaǵy mańyzdy qurlyq dálizine jáne álemdik mańyzy bar kólik-tranzıttik toraptardyń birine aınalatynyn atap ótti.
«Oblysta tranzıttik áleýetti damytý úshin barlyq resýrstar bar. «Dostyq» jáne «Nur joly» eki halyqaralyq ótkizý pýnkti, «Dostyq» jáne «Altynkól» shekaralyq temirjol stansalary ornalasqan, halyqaralyq tranzıttik marshrýttar ótedi. Óńirdiń barlyq múmkindikterin kólik-logıstıkalyq salaǵa tartý qajet», - dedi ol.
Úkimet basshysy bul baǵytta Dostyq - Moıynty temirjol ýchaskesinde ekinshi joldardyń qurylysy ýaqtyly bastalǵanyn atap ótti, óıtkeni Qytaıdyń shekteýlerdi alyp tastaýy aıasynda Eýropaǵa júk tasymaldaý qarqyndy óse túsedi.
«Biz buǵan daıyn bolýymyz kerek», - dedi Álıhan Smaıylov.
Premer-Mınıstr sonymen qatar, Úsharal qalasyndaǵy áýejaıdyń ushý-qoný jolaǵyn qaıta jańartýdy aıaqtaýdyń mańyzdylyǵyn atap ótti, sonyń arqasynda úlken fıýzelıajy bar áýe kemelerin qabyldaý múmkindigi paıda boldy. Onyń aıtýynsha, júrgizilip jatqan avtojoldardy jańǵyrtý jáne qosymsha poıyzdardy iske qosýmen birge, bul Alakól jáne Balqash kólderiniń týrıstik aımaqtaryn damytýǵa aıtarlyqtaı áser etedi.
Álıhan Smaıylov jalpy kólik salasynda zamanaýı ınfraqurylymdy qurý úshin Úkimet iri halyqaralyq seriktesterdi tartatynyn málimdedi. Atap aıtqanda, «Dostyq» stantsııasynda kópfýnktsıonaldy júk tasymaldaý termınaly salyndy. Jalpy júk aınalymy jylyna 1 mln tonnadan astam, ınvestıtsııa somasy 3 mlrd teńge bolatyn qoıma qýatyn engizý josparlanǵan. Sondaı-aq, 500-1000 birlikke arnalǵan eýrofýr jeke parkin qalyptastyrý josparlanyp otyr. Bastapqy kezeńde munda ınvestıtsııalardyń jalpy kólemi 5 mlrd teńgeden asady.
