Jetisý oblysyndaǵy tsement zaýytynyń júrgizýshileri ekinshi kún qatarynan jumysyn toqtatty
Olardyń mundaı áreketke barýyna jol kólik apatynyń jıileýi sebep bolǵan. Aıtýlarynsha, kólikter tehnıkalyq tekserýden ótpeı toqtaýsyz jumys isteıdi. Ruqsat etilgen 18 tonnnanyń ornyna 35-40 tonna shıkizat tıeledi. Kúni keshe taǵy bir kólik apatqa ushyrap, júrgizýshiniń aıaǵy synyp, jambasy shyqqan. Aýyr júk tıegen kóliktiń tejegishi isten shyǵyp, qatty ekpinmen taýǵa soǵylǵan. Jumysshylardyń paıymdaýynsha, zaýyttaǵy kólikterge tehnıkalyq tekserý múldem júrgizilmeıdi. Jalaqy tómen.
«Mynaǵan qandaı kómekter kórsetiledi, qandaı járdem bolady dep surasaq, basshylarymyz eshqandaı aqsha tólenbeıtindigin aıtty. Biz janymyz ashyp, baýyrymyz sondaı hálde jatqanyn kórip, jumysty toqtatýǵa májbúr boldyq»,- dedi kólik júrgizýshi Erjan Dáýletbaqov.
Ortaq mámilege kele almaǵan eki taraptyń máselesine jergilikti bılik ókilderi men prokýratýra aralasty. Nátıjesinde jumys berýshiler júrgizýshilermen qaıtadan kelisimshartqa otyratyn boldy. Sondaı-aq tsement zaýytynyń basshylary budan bylaı kólikke shamadan tys júk tıeýdi toqtatyp, Qazaqstan zańnamalarynda belgilengen mólshermen shıkizat tasymaldaıtyn boldy.
«Biz budan bylaı tehnıkany qatań baqylaýǵa alamyz. Jóndeý tsehy men kólikti jóndeıtin jumysshylardyń da jumysyn qadaǵalaımyz. Júrgizýshilerdiń usynystaryn nazarǵa alamyz. Ózimiz de jańa talaptar qoıatyn bolamyz. Zardap shekken azamatqa kómek kórsetip, jaǵdaıyn jeke ózim baqylap otyramyn»,- dedi kóliktik kompanııa quryltaıshysy Djý Sıaý Lý.
