Jetisý oblysynda júk kólikterin tonaǵan qylmystyq top ustaldy
Uıymdasqan qylmysqa qarsy kúres basqarmasy Jetisý oblysy prokýratýrasynyń úılestirýimen Jetisý óńiri arqyly Almaty – Óskemen tas jolynyń boıymen tranzıtpen ketip bara jatqan aýyr júk kólikterinen múlikti urlaýmen aınalysqan qylmyskerlerdi anyqtaý boıynsha jedel-izdestirý is-sharalaryn júrgizdi. 10 shildede uzaq jáne úılesimdi jumystyń nátıjesinde alty adamnan turatyn top ustaldy. Olar júıeli túrde asa dórekilikpen iri partııaly júk kólikterden túrli taýarlardy urlaǵan. Bul toptyń jumysy urlanǵan múlikti satýǵa deıin jaqsy uıymdastyrylǵan.
«Qylmyskerlerdiń bir shema boıynsha áreket etkeni anyqtaldy: olar túnde tas jolǵa shyǵyp, fýranyń artynda júrip kele jatyp, trassada júk kóligi jyldamdyǵyn báseńdetetin jáne teńselmeı júretin jerlerdi tańdamaq bolǵan. Óz kólikteriniń shamdaryn aldyn ala sóndirip, kóliktiń shaǵylystyratyn elementterin japsyryp qoıýǵa tyrysqan. Qaraqshylar aýyr júkke jaqyndap, onymen túıisý kezinde ilgegi bar arnaıy jasalǵan baspaldaqtyń kómegimen júk kóliginiń tóbesine kóterilgen. Ekeýi júk kóliginiń tóbesine shyǵyp, tenttiń joǵarǵy bóligin kesip, bireýi fýranyń ishine kirip, ekinshisine taýardy berip otyrdy. Onyń barlyǵy jol jıegine laqtyrylǵan. Biraz ýaqyttan keıin, sybaılastary GAZel avtokóligimen taýarlardy jınaýǵa kirisken. Urlanǵan zattardy satýǵa Almaty qalasyndaǵy tanystary kómektesken. Qazirgi ýaqytta birneshe adamnyń bul qylmysqa qatysy bar-joǵy tekserilip jatyr», – dedi Jetisý oblysy PD bastyǵynyń orynbasary Ábdikenov.
Olardy ustaý kezinde Jetisý, Almaty oblysynyń jáne Almaty qalasynyń aýmaǵynda 30-dan astam tintý is-sharasy ótkizildi.
Sotqa deıingi tergep-tekserý QR QK-niń 188-baby 4-bóligi (Qylmystyq top jasaǵan urlyq) boıynsha júrgizilip jatyr.
Qazir kúdiktiler qamaýǵa alyndy. Polıtseıler basqa zardap shekken adamdardy anyqtaý jáne ustalǵandardyń uqsas qylmystarǵa qatysy bar-joǵyn tekserý jumystaryn jalǵastyryp jatyr.
