Jetisý oblysynda júgeri ekken sharýalar ónimderin ótkize almaı otyr
Qazir Panfılov aýdanyna qarasty Almaly aýylyndaǵy sharýalardyń júgerisi qoımaǵa syımaı, dalada obaldy bolyp jatyr. Dıqanshylardyń sózinshe, olar 2 myń tonnadan artyq ónimin ótkize almaı júr. Sebebi, júgeri qabyldaıtyn jerdiń baǵasy shyǵynymyzdy aqtamaı tur deıdi.
«Byltyrǵy jylǵy ónimimizdi áli ótkize almaı, sonymen qan qaqsap otyrmyz. Esh jer almaıdy. Baǵanyń barlyǵyn tómen túsirip tastaǵan. Ár qaısysymyzda 4-5 gektar jerimiz bar. Basqa júzdegen gektar jerimiz joq. 4-5 gektardyń ónimin ótkize almaı zar qaqsap otyrmyz. Byltyr kelisiniń baǵa 120teńge bolsa, bıyl 80 teńge», - dedi Panfılov aýdanynyń turǵyny Qalı Raıymbekov.
Jetisý oblystyq aýylsharýashylyq basqarmasynyń basshysy der kezinde ónimderin ótkizbegen sharýalardyń ózin kinálap otyr. Sebebi, kúz naýqanynda júgeriniń kelisi 120 teńgeden, onyń syrtynda 6 teńge memleketten sýbsıdııa berilip, qabyldanǵanyn aıtady. ıAǵnı, sharýalar bir tonna júgerini 126 myń teńgege satqan. Endi, baǵanyń túsip ketkenine biz kináli emespiz deıdi.
«Der kezinde ótkizýi kerek edi. Júgeriniń baǵasy qymbattaıdy degen oımenen qambalarynda osy kúnge deıin ustap otyrǵan. Biz, árıne, bul máseleni qarastyramyz, biraq birde-bir kásiporynǵa myna júgerini al degen mindet qoıa almaımyz», - dedi Jetisý oblystyq aýyl sharýashylyǵy basqarmasynyń basshysy Nurdáýlet Kenenbaev.
Al sharýalar Almaly aýyly taýly aımaqta ornalasqandyqtan, júgeri ózge aýyldarǵa qaraǵanda jaı pisetinin aıtady. Sondyqtan der kezinde ótkize almadyq deıdi. Endi, dıqanshylar byltyrǵy ónimderin ótkizbese, bıylǵy eginin sebe almaıdy. Sebebi, kóktemnen bastap, ala jazdaıǵy eńbekteri tabysqa keneltýdńǵ ornyna shyǵynǵa batyryp jatyr. Sondyqtan, bul iske mınıstrliktiń ózi aralasyp, sheship berýin surap otyr.
