Jetisý oblysynda jeńil avto júk kóliginiń astyna kirip ketip, 5 adam aýrýhanaǵa jetkizildi

TALDYQORǴAN. QazAqparat – Jetisý oblysynda jeńil avto júk kóliginiń astyna kirip ketip, 5 adam aýrýhanaǵa jetkizildi, dep habarlaıdy QazAqparat tilshisi.

Jetisý oblysynda «MAN» júk kóligi men «Volkswagen Passat» jol-kólik oqıǵasyna ushyrady.

«Oqıǵa búgin «Almaty-Óskemen» tasjolynyń 466-shaqyrymynda boldy. Boljam boıynsha, jeńil kóliktiń 42 jastaǵy júrgizýshisi rýlde uıyqtap ketip, qarama-qarsy jolda turǵan júk kóliginiń astyna kirip ketken», - delingen Jetisý oblystyq polıtsııa departamenti baspasóz qyzmetiniń habarlamasynda.

Vedomstvonyń aqparatyna sáıkes, aýrýhanaǵa bes adam jetkizildi. Olardyń ekeýi aýyr jaraqat alǵan. Medıtsınalyq tekserýden keıin úsh jolaýshy ambýlatorııalyq emdelýge jiberildi.

Eki kólik te arnaıy avtoturaqqa qoıyldy. Atalǵan fakti boıynsha sotqa deıingi tergeý amaldary bastaldy.