Jetisý oblysynda jaryqsyz otyrǵan Qaratal aýdanyna elektr qýaty berildi

TALDYQORǴAN. QazAqparat - Jetisý oblysy Qaratal aýdanynda nóser jaýyn men qatty jeldiń saldarynan zaqymdanǵan elektr jelisi qalpyna kelip, aýdanǵa elektr jaryǵy berildi. Al Eltaı aýyldyq okrýgine qarasty Abaı aýylynyń úzilgen elektr jelisin apattyq brıgada jóndeý júrgizip jatyr. Mamandar Abaı aýylyna jaryq erteń, ıaǵnı 13 tamyz kúngi saǵat 13.00-ge deıin beriletinin aıtady, dep habarlaıdy QazAqparat oblys ákiminiń baspasóz qyzmetine silteme jasap.

Oblystyq energetıka jáne TÚKSh basqarmasynyń basshysy Áset Qanaǵatovtyń sózine súıensek, Taldyqorǵan – Úshtóbe 110 KV joǵary voltty jelisiniń boıyndaǵy apattyq oryndy kezekshi brıgada saǵat 15.05-te anyqtap, qalyna keltirý jumystaryn atqarǵannan keıin saǵat 19.05-te Qaratal aýdanyna tutastaı elektr jaryǵy berilgen.

«Oǵan deıin biz Qaratal aýdanynyń ómirlik mańyzy bar nysandaryn Kóksý aýdanynyń jelisi arqyly elektrmen ýaqytsha qamtydyq. Qazir aýdanǵa elektr jaryǵy tolyq úzilissiz berildi», - dedi Á. Qanaǵatov.

Sonymen qatar «Taldyqorǵan - Úshtóbe» avtojolynyń 35-shi shaqyrymynda bolǵan elektr jelileriniń úzilýi men baǵanalardyń zaqymdanýy saldarynan jol aralyǵyndaǵy Abaı aýylynyń da jaryǵy sóngen bolatyn.

Bul jerde 7 baǵana zaqymdanyp, 13 aralyq úzilgen.

Osyǵan baılanysty qazir jóndeý jumystary júrip jatyr.

Energetıka jáne TÚKSh basqarmasy Abaı aýylyna 13 tamyzda saǵat 13.00-ge deıin jaryq beriletinin aıtty.

Buǵan deıin Jetisý oblysynyń eki aýdanynda turǵyndar jaryqsyz otyrǵanyn habarlaǵan edik.

Eske sala keteıik, Jetisý oblysynyń Eskeldi aýdanynda qatty jaýyn saldarynan 50 turǵyn evakýatsııalanǵan.

Kóshirilgen turǵyndar mektepke ornalastyryldy. Sý tasqynyna baılanysty jedel jeli iske qosyldy.

Búgin aýdandaǵy eki aýyldyń kóshelerin alyp ketken sel toqtady, kóshirilgen 19 adam mektepti panalap otyr.