Jetisý oblysynda jalǵan medıtsınalyq sertıfıkattar satylyp kelgen
Jetisý polıtsııasy oblys prokýratýrasynyń úılestirýimen Taldyqorǵannyń úsh turǵynyn ustady. Olar ártúrli óńirdegi medıtsına qyzmetkerlerine biliktilikti arttyrý jónindegi jalǵan sertıfıkattar satyp kelgen. Atalǵan sertıfıkattar medıtsınalyq qyzmetpen aınalysýǵa, klınıkalyq praktıkaǵa ruqsat alýǵa (mamandyǵy boıynsha naýqastarmen jumys isteýge), kvalıfıkatsııalyq biliktilikti taǵaıyndaýǵa múmkindik beredi.
Jalǵan sertıfıkattardy daıyndaýmen jáne satýmen oblystyq Densaýlyq saqtaý basqarmasynda jumys isteıtin baǵdarlamashylardyń biri, quqyq qorǵaý organynyń burynǵy qyzmetkeri jáne jeke medıtsına ortalyǵynyń medbıkesi aınalysqan.
«Kúdiktilerdiń jumys orny men turatyn jerlerin tintý kezinde túrli medıtsınalyq oqý oryndary men mekemeleri atynan ártúrli adamdarǵa jazylǵan biliktilik sertıfıkattary, sondaı-aq qylmystyq áreketke dálel bolatyn ózge de zattar tabyldy.
Zańsyz qyzmet úshin aqshalaı syıaqy eldiń túrli óńirinen bank kortochkasyna aýdarý arqyly júrgizilgen.
Qazirgi ýaqytta ustalǵandardyń barlyǵynan moıyndaý jaýaby alyndy. Tergeý amaldary jalǵasyp jatyr», - dedi Jetisý oblysynyń Polıtsııa departamenti Uıymdasqan qylmysqa qarsy kúres basqarmasynyń bastyǵy Sarqytbaı Qusaıynov.
