Jetisý oblysynda medıtsınalyq keshen paıdalanýǵa berildi

TALDYQORǴAN. QazAqparat - Jetisý oblysy Qaratal aýdany Kókpekti aýylynda bloktyq-modýldik keshen paıdalanýǵa berildi, - dep habarlaıdy QazAqparat tilshisi.

Turǵyndar sany 1200-den asatyn aýylda medıtsına mamandary dárigerge deıingi kómek, dárigerdiń taǵaıyndaýlaryn oryndaý, balalar men júkti áıelderdi patronajdaý jáne aýyl halqynyń densaýlyq jaǵdaıyn júıeli túrde baqylaý jumystaryn júrgizetin bolady.

Nysannyń jalpy alańy 108 sharshy metr. Onda em-shara qabyldaý bólmesi, materıaldar jınaqtaý jáne zertteý júrgizý bólmesi, naýqastardy qabyldaý bólmesi jáne basqa da sharýashylyqqa qajetti bólmeler bar.
Óńirdegi densaýlyq saqtaý basqarmasynyń málimetinshe, Jetisý oblysynda 2023 jyly aýyldyq eldi mekenderde osyndaı 25 bloktyq-modýldik keshen ornatý josparlanǵan.