Jetisý oblysynda kólik aýdarylyp, 30 jastaǵy áıel mert boldy

TALDYQORǴAN. QazAqparat - Jetisý oblysynda kólik aýdarylyp, oqıǵa ornynda 30 jastaǵy áıel mert boldy, - dep habarlaıdy QazAqparat tilshisi.

Jol kólik oqıǵasy 1 shildede Kerbulaq aýdanynda tirkeldi. «Saryózek-Kóktal» tas jolynyń 67 shaqyrymynda jol-kólik apaty boldy. Jóndeý jumystary júrgizilip jatqan ýchaskede 25 jastaǵy «Toyota Harrier» júrgizýshisi kóliktiń aýdarylýyna jol berdi.

«Avtokólik salonynda júrgizýshimen birge úsh adam bolǵan. Oqıǵa ornynda 30 jastaǵy áıel qaıtys boldy. Aıaǵy synyp jáne basqa da jaraqat alǵan kólik júrgizýshisi Saryózek aýylynyń aýrýhanasyna jatqyzyldy.

Polıtsııa kólik júrgizýshilerinen jyldamdyq rejımin qatań saqtaýdy suraıdy. Esińizde bolsyn, jol erejesin elemeý, qaıǵyly jaǵdaıǵa ákeledi»,- delingen Jetisý oblystyq polıtsııa departamenti baspasóz qyzmetiniń habarlamasynda.