Jetisý oblysynda kásipkerdi qorqytyp, aqsha talap etken qylmystyq top ustaldy
Ondaǵy málimetterge qaraǵanda kúdiktilerdi Jetisý oblysy Polıtsııa departamentiniń uıymdasqan qylmysqa qarsy kúres basqarmasynyń jedel qyzmetkerleri arnaıy jasaq jaýyngerleriniń kómegimen Jarkent qalasynda qolǵa túsirgen. Kúdiktiler jergilikti kásipkerden 15 myń qytaı ıýanin talap etken.
– Uıymdasqan top úsh adamnan turady. Bireýi - Almaty qalasynyń turǵyny, ekinshisi - Almaty oblysynan, úshinshisi - Jetisý oblysynyń turǵyny. Jábirlenýshi olarǵa aqsha berý kezinde ustaldy. Olardyń bireýinen 9 mm kalıbrli 13 patrony bar tapansha (sıgnaldyq) tabylyp, tárkilendi, – dep habarlady Jetisý oblysy PD UQQKB bastyǵy Sarqytbaı Qusaıynov.
Atalǵan fakt boıynsha tergeý amaldary QR QK-niń 194-babyna sáıkes «Qorqytyp alý» júrgiziledi. Ustalǵan adamdar ýaqytsha ustaý ızolıatoryna qamaldy.
