Jetisý oblysynda qańtar oqıǵasynda urlanǵan qarý-jaraq tabyldy

TALDYQORǴAN. QazAqparat – Jetisý oblysynda qańtardaǵy tártipsizdik kezinde dúkenderden urlanǵan úsh pnevmatıkalyq qarý saqtalǵan jasyryn oryn tabyldy, dep habarlaıdy QazAqparat tilshisi.

Bul fakt 29 naýryzda Kerbulaq aýdanynda tirkeldi. Urlanǵan qarýdy jergilikti turǵyndar Qoǵaly-Shaǵan avtojolynyń boıynan tapqan jáne aýdandyq polıtsııaǵa habarlaǵan. Kórsetilgen jerden 4,5 jáne 6 mm kalıbrli «BSA Ultra», «Action sport games» jáne «BSA Us» úsh pnevmatıkalyq vıntovka tárkilendi.

«Derekter bazasyn tekserý kezinde qarýdyń 2022 jylǵy qańtarda Almatynyń ańshylyq dúkenderiniń birinen urlanǵany anyqtaldy. Qazirgi ýaqytta fakt boıynsha jınalǵan materıal tárkilengen myltyqtarmen birge polıtsııa bólimshesine jiberildi», - dedi Kerbulaq aýdany PB bastyǵy Erbol Ahmetqalıev.